1兄弟ah，(我taⁿ是kap bat律法ê teh講，) lín kiám m̄知律法管人到伊一世人mah？Hiaⁿ-tī ah, (góa taⁿ sī kap bat lu̍t-hoat ê teh kóng,) lín kiám m̄ chai lu̍t-hoat koán lâng kàu i chi̍t-sì-lâng mah?

2因為有丈夫ê婦人人，丈夫活teh ê時，伊就hō͘律法所縛來tè伊ê丈夫；丈夫若死，就脫離丈夫ê律法。In-ūi ū tiōng-hu ê hū-jîn-lâng, tiōng-hu oa̍h-teh ê sî, i chiū hō͘ lu̍t-hoat só͘ pa̍k lâi tè i ê tiōng-hu; tiōng-hu nā sí, chiū thoat-lī tiōng-hu ê lu̍t-hoat.

3所以丈夫tī-teh，若tè別人，就叫伊做淫婦；丈夫若死，就得tio̍h tháu放脫離律法；雖然tè別人，也m̄是淫婦。Só͘-í tiōng-hu tī-teh, nā tè pa̍t lâng, chiū kiò i chòe îm-hū; tiōng-hu nā sí, chiū tit-tio̍h tháu-pàng thoat-lī lu̍t-hoat; sui-jiân tè pa̍t lâng, iā m̄ sī îm-hū.

4Án-ni我ê兄弟ah，lín tùi基督ê身軀，ǹg律法已經死，beh hō͘ lín tè別ê，就是hit-ê tùi死koh活ê，hō͘咱為tio̍h上帝結果子。Án-ni góa ê hiaⁿ-tī ah, lín tùi Ki-tok ê seng-khu, ǹg lu̍t-hoat í-keng sí, beh hō͘ lín tè pa̍t-ê, chiū-sī hit ê tùi sí koh-oa̍h ê, hō͘ lán ūi-tio̍h Siōng-tè kiat ké-chí.

5因為咱tiàm-tī肉體ê時，hiah-ê罪惡ê情慾，tùi律法激起ê，運動tī咱ê百體，致到咱為tio̍h死結果子。In-ūi lán tiàm-tī jio̍k-thé ê sî, hiah ê chōe-ok ê chêng-io̍k, tùi lu̍t-hoat kek-khí ê, ūn-tōng tī lán ê pah-thé, tì-kàu lán ūi-tio̍h sí kiat ké-chí.

6但是現今咱有脫離律法，是平素把縛咱ê，咱已經ǹg伊來死，致到咱ê服事是tī心神ê新款，m̄是tī文字ê 舊款。Nā-sī hiān-kim lán ū thoat-lī lu̍t-hoat, sī pêng-sò͘ pé-pa̍k lán ê, lán í-keng ǹg i lâi sí, tì-kàu lán ê ho̍k-sāi sī tī sim-sîn ê sin khoán, m̄ sī tī bûn-jī ê kū khoán.

7Án-ni咱beh怎樣講？律法是罪惡mah？斷斷m̄是；總是若無tùi律法，我就m̄知罪：因為律法若無講，M̄-thang貪慾，我就m̄知貪慾；Án-ni lán beh cháiⁿ-iūⁿ kóng? Lu̍t-hoat sī chōe-ok mah? Toàn-toàn m̄ sī; chóng-sī nā bô tùi lu̍t-hoat, góa chiū m̄ chai chōe: in-ūi lu̍t-hoat nā bô kóng, M̄ thang tham-io̍k, góa chiū m̄ chai tham-io̍k;

8但是罪惡乘機會，tùi誡命做成ta̍k樣ê貪慾tī我ê心；因為無律法，罪惡是死。nā-sī chōe-ok sēng ki-hōe, tùi kài-bēng chòe-chiâⁿ ta̍k iūⁿ ê tham-io̍k tī góa ê sim; in-ūi bô lu̍t-hoat, chōe-ok sī sí.

9前無律法，我就活；誡命到，罪惡活起來，我就死。Chêng bô lu̍t-hoat, góa chiū oa̍h; kài-bēng kàu, chōe-ok oa̍h-khí-lâi, góa chiū sí.

10誡命本是beh hō͘人活，照我見過反tńg是hō͘人死。Kài-bēng pún sī beh hō͘ lâng oa̍h, chiàu góa kìⁿ-kè hoán-tńg sī hō͘ lâng sí.

11因為罪惡乘機會，tùi誡命欺騙我，koh對伊來害死我。In-ūi chōe-ok sēng ki-hōe, tùi kài-bēng khi-phiàn góa, koh tùi i lâi hāi-sí góa.

12Án-ni-siⁿ律法是聖，誡命也是聖，是義，是好。Án-ni-siⁿ lu̍t-hoat sī sèng, kài-bēng iā sī sèng, sī gī, sī hó.

13若是án-ni，hit-ê好ê是hō͘我死mah？斷斷m̄是。是罪惡tùi hit-ê好ê hō͘我死，beh顯出伊是罪惡；hō͘罪惡tùi誡命成做罪惡ê極頭。Nā-sī án-ni hit ê hó-ê sī hō͘ góa sí mah? Toàn-toàn m̄ sī. Sī chōe-ok tùi hit ê hó-ê hō͘ góa sí, beh hián-chhut i sī chōe-ok; hō͘ chōe-ok tùi kài-bēng chiâⁿ chòe chōe-ok ê ke̍k-thâu.

14因為咱知律法是屬tī神ê，但是我是屬tī肉體ê，已經賣去hō͘罪惡。In-ūi lán chai lu̍t-hoat sī sio̍k tī sîn ê, nā-sī góa sī sio̍k tī jio̍k-thé ê, í-keng bōe-khì hō͘ chōe-ok.

15因為我所做ê家己m̄知；因為我所teh行ê，m̄是我所意愛；反tńg我所怨ê，我去行伊。In-ūi góa só͘ chòe ê ka-kī m̄ chai; in-ūi góa só͘ teh kiâⁿ ê, m̄ sī góa só͘ ì-ài; hoán-tńg góa só͘ oàn ê, góa khì kiâⁿ i.

16Taⁿ我若行所m̄-ài ê，我就是承認律法做好。Taⁿ góa nā kiâⁿ só͘ m̄ ài ê, góa chiū-sī sêng-jīn lu̍t-hoat chòe hó.

17Án-ni行伊ê，taⁿ m̄是我，是tiàm-tī我心內ê罪惡。Án-ni kiâⁿ i ê, taⁿ m̄ sī góa, sī tiàm-tī góa sim-lāi ê chōe-ok.

18因為我知我內面，就是我肉體內，無好tī-teh；因為論hit-ê意愛，我就有，行hit-ê好，我就無。In-ūi góa chai góa lāi-bīn, chiū-sī góa jio̍k-thé lāi, bô hó tī-teh; in-ūi lūn hit ê ì-ài, góa chiū ū, kiâⁿ hit ê hó, góa chiū bô.

19因為我所意愛ê好，我無去行；我所m̄-ài ê pháiⁿ，反tńg去行。In-ūi góa só͘ ì-ài ê hó, góa bô khì kiâⁿ; góa só͘ m̄ ài ê pháiⁿ, hoán-tńg khì kiâⁿ.

20獨獨我若行我所m̄-ài ê，hit-ê teh行ê，taⁿ m̄是我，是tiàm-tī我內面ê罪惡。To̍k-to̍k góa nā kiâⁿ góa só͘ m̄ ài ê, hit ê teh kiâⁿ ê, taⁿ m̄ sī góa, sī tiàm-tī góa lāi-bīn ê chōe-ok.

21Án-ni我得知有一個法，就是當我ài行好ê時，pháiⁿ kap我tī-teh。Án-ni góa tit-chai ū chi̍t ê hoat, chiū-sī tng góa ài kiâⁿ hó ê sî, pháiⁿ kap góa tī-teh.

22因為我照內心是歡喜上帝ê律法。In-ūi góa chiàu lāi-sim sī hoaⁿ-hí Siōng-tè ê lu̍t-hoat.

23但是我看百體中有別個法kap我心志ê法相交戰，掠我來降服百體內罪惡ê法。Nā-sī góa khòaⁿ pah-thé tiong ū pa̍t ê hoat kap góa sim-chì ê hoat saⁿ kau-chiàn, lia̍h góa lâi hâng-ho̍k pah-thé lāi chōe-ok ê hoat.

24苦ah，我ê做人！是誰 beh救我脫出chit-ê致到死ê體ah？Khó͘ ah, góa ê chòe lâng! chī-chūi beh kiù góa thoat-chhut chit ê tì-kàu sí ê thé ah?

25感謝上帝是對咱ê主耶穌基督。Án-ni我本身用心志順服上帝ê法，用肉體順服罪惡ê法。Kám-siā Siōng-tè sī tùi lán ê Chú Iâ-so͘ Ki-tok. Án-ni góa pún-sin ēng sim-chì sūn-ho̍k Siōng-tè ê hoat, ēng jio̍k-thé sūn-ho̍k chōe-ok ê hoat.

1所以hiah-ê tiàm-tī基督耶穌ê，taⁿ lóng無定罪。Só͘-í hiah ê tiàm-tī Ki-tok Iâ-so͘ ê, taⁿ lóng bô tēng chōe.

2因為活命ê神ê法，tī基督耶穌已經tháu放我脫離罪kap死ê法。In-ūi oa̍h-miā ê Sîn ê hoat, tī Ki-tok Iâ-so͘ í-keng tháu-pàng góa thoat-lī chōe kap sí ê hoat.

3因為律法所bōe會ê，是tùi肉體chiah無力，上帝就差家己ê Kiáⁿ，tī有罪ê肉體ê形狀，koh為tio̍h罪 ê緣故，tī肉體中來擬定罪惡；In-ūi lu̍t-hoat só͘ bōe-ōe ê, sī tùi jio̍k-thé chiah bô la̍t, Siōng-tè chiū chhe ka-kī ê Kiáⁿ, tī ū chōe ê jio̍k-thé ê hêng-chōng, koh ūi-tio̍h chōe ê iân-kò͘, tī jio̍k-thé tiong lâi gí-tiāⁿ chōe-ok;

4hō͘律法ê義tī咱會得滿足，就是無照肉體，是照神來行ê。hō͘ lu̍t-hoat ê gī tī lán ōe tit móa-chiok, chiū-sī bô chiàu jio̍k-thé, sī chiàu sîn lâi kiâⁿ ê.

5因為照肉體ê，意向肉體ê事；照神ê，意向神ê事。In-ūi chiàu jio̍k-thé ê, ì-hiòng jio̍k-thé ê sū; chiàu sîn ê, ì-hiòng sîn ê sū.

6因為肉體ê意向是死；神ê意向是活koh平安。In-ūi jio̍k-thé ê ì-hiòng sī sí; sîn ê ì-hiòng sī oa̍h koh pêng-an.

7因為肉體ê意向是對敵上帝，因為伊無降服上帝ê律法，也bōe會降服。In-ūi jio̍k-thé ê ì-hiòng sī tùi-te̍k Siōng-tè, in-ūi i bô hâng-ho̍k Siōng-tè ê lu̍t-hoat, iā bōe-ōe hâng-ho̍k.

8Koh tiàm-tī肉體ê，bōe會hō͘上帝歡喜。Koh tiàm-tī jio̍k-thé ê, bōe-ōe hō͘ Siōng-tè hoaⁿ-hí.

9獨獨上帝ê神若khiā起tī lín，就lín無tiàm-tī肉體，是tiàm-tī神；無有基督ê神ê，m̄是伊ê人。To̍k-to̍k Siōng-tè ê Sîn nā khiā-khí tī lín, chiū lín bô tiàm-tī jio̍k-thé, sī tiàm-tī sîn; bô ū Ki-tok ê Sîn ê, m̄ sī I ê lâng.

10基督若tiàm-tī lín，就lín ê身軀因為罪死，神因為義活。Ki-tok nā tiàm-tī lín, chiū lín ê seng-khu in-ūi chōe sí, sîn in-ūi gī oa̍h.

11獨獨hō͘耶穌tùi死人中koh活ê，伊ê神若khiā起tī lín，就hō͘基督耶穌tùi死人中koh活ê，也beh將伊ê神，就是khiā起tī lín ê，hō͘ lín會死ê身軀koh活。To̍k-to̍k hō͘ Iâ-so͘ tùi sí-lâng tiong koh-oa̍h ê, I ê Sîn nā khiā-khí tī lín, chiū hō͘ Ki-tok Iâ-so͘ tùi sí-lâng tiong koh-oa̍h ê, iā beh chiong I ê Sîn, chiū-sī khiā-khí tī lín ê, hō͘ lín ōe sí ê seng-khu koh-oa̍h.

12Án-ni兄弟ah，咱m̄是欠肉體ê債，致到照肉體來活。Án-ni hiaⁿ-tī ah, lán m̄ sī khiàm jio̍k-thé ê chè, tì-kàu chiàu jio̍k-thé lâi oa̍h.

13因為lín若照肉體來活，就會死；若用神phah死身軀ê所做，就會活。In-ūi lín nā chiàu jio̍k-thé lâi oa̍h, chiū ōe sí; nā ēng sîn phah-sí seng-khu ê só͘ chòe, chiū ōe oa̍h.

14凡若hō͘上帝ê神所chhōa ê，是做上帝ê kiáⁿ。Hoān-nā hō͘ Siōng-tè ê Sîn só͘ chhōa ê, sī chòe Siōng-tè ê kiáⁿ.

15因為lín m̄是受tio̍h奴僕ê神，致到koh驚惶；就是受tio̍h設立做kiáⁿ ê神，tùi án-ni咱叫講，阿爸，父ah。In-ūi lín m̄ sī siū-tio̍h lô͘-po̍k ê sîn, tì-kàu koh kiaⁿ-hiâⁿ; chiū-sī siū-tio̍h siat-li̍p chòe kiáⁿ ê sîn, tùi án-ni lán kiò kóng, Á-pà, Pē ah.

16聖神家己kap咱ê神saⁿ-kap干證咱做上帝ê kiáⁿ。Sèng Sîn ka-kī kap lán ê sîn saⁿ-kap kan-chèng lán chòe Siōng-tè ê kiáⁿ.

17既然做kiáⁿ就做後嗣，就是做上帝ê後嗣，kap基督同做後嗣；咱若kap伊同受苦，是beh hō͘咱kap伊同榮光。Kì-jiân chòe kiáⁿ chiū chòe hō͘-sû, chiū-sī chòe Siōng-tè ê hō͘-sû, kap Ki-tok tâng chòe hō͘-sû; lán nā kap I tâng siū khó͘, sī beh hō͘ lán kap I tâng êng-kng.

18因為我算現時ê艱苦bōe堪得比並所beh顯明到tī咱ê榮光。In-ūi góa sǹg hiān-sî ê kan-khó͘ bōe kham-tit pí-phēng só͘ beh hián-bêng kàu tī lán ê êng-kng.

19因為受造 ê物kia̍h頭ǹg望，teh thèng候上帝眾kiáⁿ ê顯明。In-ūi siū-chō ê mi̍h kia̍h thâu ǹg-bāng, teh thèng-hāu Siōng-tè chèng kiáⁿ ê hián-bêng.

20因為受造 ê物降服tī空虛，m̄是伊甘願，就是tùi hit-ê hō͘伊降服ê；In-ūi siū-chō ê mi̍h hâng-ho̍k tī khang-hu, m̄ sī i kam-goān, chiū-sī tùi hit ê hō͘ i hâng-ho̍k ê;

21是teh ǹg望連受造 ê物也beh得tio̍h tháu放，脫離敗壞ê拘束，來入tī上帝ê kiáⁿ兒榮光ê自由。sī teh ǹg-bāng liân siū-chō ê mi̍h iā beh tit-tio̍h tháu-pàng, thoat-lī pāi-hoāi ê khu-sok, lâi ji̍p tī Siōng-tè ê kiáⁿ-jî êng-kng ê chū-iû.

22因為咱知一切受造 ê物到chit時iáu teh saⁿ-kap吐氣苦痛。In-ūi lán chai it-chhè siū-chō ê mi̍h kàu chit sî iáu teh saⁿ-kap thó͘-khùi khó͘-thàng.

23M̄-nā án-ni，就咱本身得tio̍h聖神頭水ê果子ê，也心內家己吐氣，teh thèng候設立做kiáⁿ，就是咱ê身軀ê贖回。M̄ nā án-ni, chiū lán pún-sin tit-tio̍h Sèng Sîn thâu-chúi ê ké-chí ê, iā sim-lāi ka-kī thó͘-khùi, teh thèng-hāu siat-li̍p chòe kiáⁿ, chiū-sī lán ê seng-khu ê sio̍k-hôe.

24因為咱得救是tùi ǹg望；但是已經看見ê ǹg望，m̄是ǹg望；因為所看見ê，甚麼人teh ǹg望伊？In-ūi lán tit kiù sī tùi ǹg-bāng; nā-sī í-keng khòaⁿ-kìⁿ ê ǹg-bāng, m̄ sī ǹg-bāng; in-ūi só͘ khòaⁿ-kìⁿ ê, sím-mi̍h lâng teh ǹg-bāng i?

25獨獨咱若ǹg望hit-ê所無看見ê，咱就吞忍thèng候。To̍k-to̍k lán nā ǹg-bāng hit ê só͘ bô khòaⁿ-kìⁿ ê, lán chiū thun-lún thèng-hāu.

26Koh聖神也親像án-ni扶持咱ê軟chiáⁿ；因為咱m̄知影tio̍h怎樣祈禱照所應該ê；獨獨聖神家己用bōe講出ê吐氣替咱求。Koh Sèng Sîn iā chhin-chhiūⁿ án-ni hû-chhî lán ê nńg-chiáⁿ; in-ūi lán m̄ chai-iáⁿ tio̍h cháiⁿ-iūⁿ kî-tó chiàu só͘ eng-kai ê; to̍k-to̍k Sèng Sîn ka-kī ēng bōe kóng-chhut ê thó͘-khùi thòe lán kiû.

27鑑察人ê心ê也知聖神ê意思，因為伊照上帝ê意思來替聖徒求。Kàm-chhat lâng ê sim ê iā chai Sèng Sîn ê ì-sù, in-ūi I chiàu Siōng-tè ê ì-sù lâi thòe sèng-tô͘ kiû.

28Koh咱知萬項事saⁿ-kap來hō͘疼上帝ê人得tio̍h利益，就是照伊定tio̍h ê旨意來受召ê。Koh lán chai bān hāng sū saⁿ-kap lâi hō͘ thiàⁿ Siōng-tè ê lâng tit-tio̍h lī-ek, chiū-sī chiàu I tiāⁿ-tio̍h ê chí-ì lâi siū tiàu ê.

29因為伊所事先知ê，就事先定tio̍h in kap伊ê Kiáⁿ ê像同款，hō͘伊tī chōe-chōe兄弟ê中間做大kiáⁿ。In-ūi I só͘ tāi-seng chai ê, chiū tāi-seng tiāⁿ-tio̍h in kap I ê Kiáⁿ ê siōng tâng khoán, hō͘ I tī chōe-chōe hiaⁿ-tī ê tiong-kan chòe tōa kiáⁿ.

30Koh所事先定tio̍h ê，就召in；所召ê，就稱in做義；所稱做義ê，就hō͘ in有榮光。Koh só͘ tāi-seng tiāⁿ-tio̍h ê, chiū tiàu in; só͘ tiàu ê, chiū chheng in chòe gī; só͘ chheng-chòe-gī ê, chiū hō͘ in ū êng-kng.

31論到chiah-ê事咱beh怎樣講？上帝若為咱，是誰會對敵咱？Lūn-kàu chiah ê sū lán beh cháiⁿ-iūⁿ kóng? Siōng-tè nā ūi lán, chī-chūi ōe tùi-te̍k lán?

32伊既然無惜家己ê Kiáⁿ，為tio̍h咱眾人獻伊，kiám無續將萬物白白hō͘咱mah？I kì-jiân bô sioh ka-kī ê Kiáⁿ, ūi-tio̍h lán chèng lâng hiàn I, kiám bô sòa chiong bān mi̍h pe̍h-pe̍h hō͘ lán mah?

33Chī-chūi beh告上帝所揀ê百姓ah？稱in做義ê是上帝；Chī-chūi beh kò Siōng-tè só͘ kéng ê peh-sìⁿ ah? Chheng in chòe gī ê sī Siōng-tè;

34是誰定in ê罪ah？基督耶穌已經死，尚且tùi死人中koh起來，坐tī上帝ê大pêng，也替咱祈禱。chī-chūi tēng in ê chōe ah? Ki-tok Iâ-so͘ í-keng sí, siōng-chhiáⁿ tùi sí-lâng tiong koh khí-lâi, chē tī Siōng-tè ê tōa pêng, iā thòe lán kî-tó.

35Chī-chūi beh隔斷咱tī基督ê疼？或是患難，或是困苦，或是khún-tio̍k，或是iau餓，或是thǹg-theh，或是危險，或是利刀ah？Chī-chūi beh keh-tn̄g lán tī Ki-tok ê thiàⁿ? He̍k-sī hoān-lān, he̍k-sī khùn-khó͘, he̍k-sī khún-tio̍k, he̍k-sī iau-gō, he̍k-sī thǹg-theh, he̍k-sī gûi-hiám, he̍k-sī lāi-to ah?

36親像所記載，講， 阮為tio̍h你ê緣故終日受死， 看做親像beh thâi ê羊。Chhin-chhiūⁿ só͘ kì-chài, kóng, Goán ūi-tio̍h lí ê iân-kò͘ chiong ji̍t siū sí, Khòaⁿ chòe chhin-chhiūⁿ beh thâi ê iûⁿ.

37反tńg tī chiah-ê lóng總ê事，咱tùi疼咱ê，得勝到有chhun。Hoán-tńg tī chiah ê lóng-chóng ê sū, lán tùi thiàⁿ lán ê, tek-sèng kàu ū chhun.

38因為我深信無論是死，是活，是天使，是掌權ê，是現今ê，是將來ê，有權能ê，In-ūi góa chhim sìn bô lūn sī sí, sī oa̍h, sī thiⁿ-sài, sī chiáng-koân ê, sī hiān-kim ê, sī chiong-lâi ê, ū koân-lêng ê,

39是高，是深，á是別個受造 ê物，lóng bōe會隔斷咱tī上帝ê疼，就是tī咱ê主基督耶穌所有ê疼。sī koâiⁿ, sī chhim, á-sī pa̍t ê siū-chō ê mi̍h, lóng bōe-ōe keh-tn̄g lán tī Siōng-tè ê thiàⁿ, chiū-sī tī lán ê Chú Ki-tok Iâ-so͘ só͘ ū ê thiàⁿ.

1我tiàm-tī基督講話真實無白賊，我ê良心tī聖神kap我saⁿ-kap做干證，Góa tiàm-tī Ki-tok kóng ōe chin-si̍t bô pe̍h-chha̍t, góa ê liông-sim tī Sèng Sîn kap góa saⁿ-kap chòe kan-chèng,

2我有大憂悶，痛心無soah。góa ū tōa iu-būn, thòng-sim bô soah.

3因為我為tio̍h我ê兄弟，我ê骨肉ê至親，就若本身受咒詛離開基督也甘願。In-ūi góa ūi-tio̍h góa ê hiaⁿ-tī, góa ê kut-jio̍k ê chì-chhin, chiū nā pún-sin siū chiù-chó͘ lī-khui Ki-tok iā kam-goān.

4in是以色列人，有做kiáⁿ ê名份，有榮光，有chiah-ê約，有律法ê傳授，有服事ê禮儀，kap chiah-ê應允，lóng屬tī in；In sī Í-sek-lia̍t lâng, ū chòe kiáⁿ ê bêng-hūn, ū êng-kng, ū chiah ê iok, ū lu̍t-hoat ê thoân-siū, ū ho̍k-sāi ê lé-gî, kap chiah ê èng-ún, lóng sio̍k tī in;

5列祖是in ê祖，照肉體來論，基督也對in出；伊是萬物ê頂面，是上帝，堪得o-ló到代代ê。À-bēng。lia̍t-chó͘ sī in ê chó͘, chiàu jio̍k-thé lâi lūn, Ki-tok iā tùi in chhut; I sī bān mi̍h ê téng-bīn, sī Siōng-tè, kham-tit o-ló kàu tāi-tāi ê. À-bēng.

6m̄是講上帝ê話廢棄；因為tùi以色列出ê，無一盡是以色列人。M̄ sī kóng Siōng-tè ê ōe hòe-khì; in-ūi tùi Í-sek-lia̍t chhut ê, bô it-chīn sī Í-sek-lia̍t lâng.

7也m̄是因為in做亞伯拉罕ê後裔，就一盡做kiáⁿ；獨獨，tī以撒ê beh稱做你ê後裔。Iā m̄ sī in-ūi in chòe A-pek-la̍h-hán ê hō͘-è, chiū it-chīn chòe kiáⁿ; to̍k-to̍k, Tī Í-sat ê beh chheng chòe lí ê hō͘-è.

8這就是講，m̄是肉體ê kiáⁿ就算做上帝ê kiáⁿ；獨獨應允ê kiáⁿ chiah算做後裔。Che chiū-sī kóng, m̄ sī jio̍k-thé ê kiáⁿ chiū sǹg chòe Siōng-tè ê kiáⁿ; to̍k-to̍k èng-ún ê kiáⁿ chiah sǹg chòe hō͘-è.

9因為應允ê話是講，照chit-ê期我beh到，撒拉beh有一個kiáⁿ。In-ūi èng-ún ê ōe sī kóng, Chiàu chit ê kî góa beh kàu, Sat-la̍h beh ū chi̍t ê kiáⁿ.

10M̄-nā án-ni，koh有利百加對咱ê祖以撒一人來懷孕，M̄ nā án-ni, koh ū Lī-pek-ka tùi lán ê chó͘ Í-sat chi̍t lâng lâi hoâi-īn,

11kiaN2iau2-未出世，好phaiN2iau2-未行，beh hō͘上帝揀選人所定tio̍h ê旨意能久長tī-teh，m̄是出tī所行，是出tī召伊ê，kiáⁿ iáu-bē chhut-sì, hó pháiⁿ iáu-bē kiâⁿ, beh hō͘ Siōng-tè kéng-soán lâng só͘ tiāⁿ-tio̍h ê chí-ì ōe kú-tn̂g tī-teh, m̄ sī chhut tī só͘ kiâⁿ, sī chhut tī tiàu i ê,

12就kā利百加講，大ê beh服事細ê。chiū kā Lī-pek-ka kóng, Tōa-ê beh ho̍k-sāi sòe-ê.

13親像所記載講，我疼雅各，怨恨以掃。Chhin-chhiūⁿ só͘ kì-chài kóng, Góa thiàⁿ Ngá-kok, oàn-hūn Í-sò.

14Án-ni咱beh怎樣講？上帝有不義mah？斷斷m̄是。Án-ni lán beh cháiⁿ-iūⁿ kóng? Siōng-tè ū put-gī mah? Toàn-toàn m̄ sī.

15因為伊kā摩西講，我beh憐憫我所憐憫ê，我beh體貼我所體貼ê。In-ūi I kā Mô͘-se kóng, Góa beh lîn-bín góa só͘ lîn-bín ê, góa beh thé-thiap góa só͘ thé-thiap ê.

16照án-ni看，不在tī意愛ê，也不在tī行ê，是在tī憐憫人ê上帝。Chiàu án-ni khòaⁿ, put-chāi tī ì-ài ê, iā put-chāi tī kiâⁿ ê, sī chāi-tī lîn-bín lâng ê Siōng-tè.

17因為聖經kā法老講，我hō͘你興起，tiâu-tî beh用你顯明我ê權能，也hō͘我ê名報揚tī普天下。In-ūi sèng-keng kā Hoat-ló kóng, Góa hō͘ lí heng-khí, tiâu-tî beh ēng lí hián-bêng góa ê koân-lêng, iā hō͘ góa ê miâ pò-iông tī phó͘ thiⁿ-ē.

18Án-ni伊隨意憐憫人，也隨意 hō͘人硬心。Án-ni I sûi-ì lîn-bín lâng, iā sûi-ì hō͘ lâng ngī-sim.

19你beh tùi我講，怎樣伊iáu teh嫌人？因為是誰逆伊ê旨意？Lí beh tùi góa kóng, Cháiⁿ-iūⁿ I iáu teh hiâm lâng? in-ūi chī-chūi ge̍k I ê chí-ì?

20你chit-ê人ah，你是誰反tńg辯駁上帝ah？受造 ê物kiám會tùi造伊ê講，你啥事創造我án-ni？Lí chit ê lâng ah, lí chī-chūi hoán-tńg piān-pok Siōng-tè ah? Siū-chō ê mi̍h kiám ōe tùi chō i ê kóng, Lí siáⁿ-sū chhòng-chō góa án-ni?

21土ê權kiám m̄是chhut-chāi燒磁ê人，平平tùi hit塊來做器具，一個貴氣一個下賤mah？Thô͘ ê koân kiám m̄ sī chhut-chāi sio-hûi ê lâng, pîⁿ-pîⁿ tùi hit tè lâi chòe khì-kū, chi̍t-ê kùi-khì chi̍t-ê hā-chiān mah?

22設使上帝ài顯明伊ê受氣，koh hō͘人bat伊ê權能，就大大寬容吞忍hiah-ê thang受氣ê器具，便便beh敗壞ê；Siat-sú Siōng-tè ài hián-bêng I ê siū-khì, koh hō͘ lâng bat I ê koân-lêng, chiū tōa-tōa khoan-iông thun-lún hiah ê thang siū-khì ê khì-kū, piān-piān beh pāi-hoāi ê;

23也hō͘人bat伊榮光ê富有到tī thang憐憫ê器具，伊所事先備辦beh得tio̍h榮光ê，iā hō͘ lâng bat I êng-kng ê pù-ū kàu tī thang lîn-bín ê khì-kū, I só͘ tāi-seng pī-pān beh tit-tio̍h êng-kng ê,

24就是咱chiah-ê hō͘伊所召ê，m̄-nā出tī猶太人，也出tī外邦人；chiū-sī lán chiah-ê hō͘ I só͘ tiàu ê, m̄ nā chhut tī Iû-thài lâng, iā chhut tī gōa-pang lâng;

25親像伊tī何西阿ê冊講， M̄是我ê百姓，我beh稱in做百姓； m̄是得tio̍h疼ê，我beh稱in做得tio̍h疼ê。chhin-chhiūⁿ I tī Hô-se-a ê chheh kóng, M̄ sī góa ê peh-sìⁿ, góa beh chheng in chòe peh-sìⁿ; M̄ sī tit-tio̍h thiàⁿ ê, góa beh chheng in chòe tit-tio̍h thiàⁿ ê.

26前tī啥所在kā in講， Lín m̄是我ê百姓， Tī hia in beh稱做真活上帝ê kiáⁿ。Chêng tī siáⁿ só͘-chāi kā in kóng, Lín m̄ sī góa ê peh-sìⁿ, Tī hia in beh chheng chòe chin-oa̍h Siōng-tè ê kiáⁿ.

27以賽亞論以色列就叫講，以色列chiah-ê kiáⁿ，雖然in ê數額親像海沙，beh得tio̍h救ê是hiah-ê所chhun ê nā-tiāⁿ。Í-sài-a lūn Í-sek-lia̍t chiū kiò kóng, Í-sek-lia̍t chiah ê kiáⁿ, sui-jiân in ê siàu-gia̍h chhin-chhiūⁿ hái-soa, beh tit-tio̍h kiù ê sī hiah ê só͘ chhun ê nā-tiāⁿ.

28因為主beh完全koh簡捷來成伊ê話tī地裡。In-ūi Chú beh oân-choân koh kán-chia̍t lâi chiâⁿ I ê ōe tī tōe-ni̍h.

29Koh親像以賽亞事先講， 若m̄是萬軍ê主kā咱留一個種teh， 就咱已經親像所多瑪kap Gô-mô͘-la̍h一樣。Koh chhin-chhiūⁿ Í-sài-a tāi-seng kóng, Nā m̄ sī Bān-kun ê Chú kā lán lâu chi̍t ê chéng teh, Chiū lán í-keng chhin-chhiūⁿ Só͘-to-má kap Gô-mô͘-la̍h chi̍t iūⁿ.

30Án-ni咱beh怎樣講？外邦人無追jip義，iáu-kú得tio̍h義，就是tùi信ê義。Án-ni lán beh cháiⁿ-iūⁿ kóng? Gōa-pang lâng bô tui-jip gī, iáu-kú tit-tio̍h gī, chiū-sī tùi sìn ê gī.

31但是以色列人追jip成義ê法，也無得tio̍h hit-ê法。Nā-sī Í-sek-lia̍t lâng tui-jip chiâⁿ gī ê hoat, iā bô tit-tio̍h hit ê hoat.

32這是怎樣？因為in無tùi信，是tùi所行。In tio̍h-tak tī hit-ê hō͘人tio̍h-tak ê石，Che sī cháiⁿ-iūⁿ? In-ūi in bô tùi sìn, sī tùi só͘ kiâⁿ. In tio̍h-tak tī hit ê hō͘ lâng tio̍h-tak ê chio̍h,

33照所記載講， 你看，我將hō͘人tio̍h-tak ê石，跋倒人ê石磐，hē tī郇城。 見若信伊ê人無致到見笑。chiàu só͘ kì-chài kóng, Lí khòaⁿ, góa chiong hō͘ lâng tio̍h-tak ê chio̍h, poa̍h-tó lâng ê chio̍h-pôaⁿ, hē tī Sûn-siâⁿ. Kìⁿ-nā sìn I ê lâng bô tì-kàu kiàn-siàu.