1你tio̍h tī少年ê日，記念創造你ê主，就是患難ê日iáu未到，也你所講，我無thang tī伊快樂，hiah-ê年iáu未近ê時。Lí tio̍h tī siàu-liân ê ji̍t, kì-liām chhòng-chō lí ê Chú, chiū-sī hoān-lān ê ji̍t iáu-bē kàu, iā lí só͘ kóng, Góa bô thang tī i khoài-lo̍k, hiah ê nî iáu-bē kūn ê sî.

2Tī日kap光kap月kap星未變做烏暗，以及雨過身，雲未koh來ê事先。tī ji̍t kap kng kap ge̍h kap chhiⁿ bē piàn-chòe o͘-àm, í-ki̍p hō͘ kè-sin, hûn bē koh lâi ê tāi-seng.

3當hit日，顧厝ê ngia̍uh-ngia̍uh-chhoah；有力ê人酥腰(so͘-io)，挨磨ê，因為in少，就soah；tùi窗á看出去ê lóng烏暗；Tng hit-ji̍t, kò͘-chhù--ê ngia̍uh-ngia̍uh-chhoah; ū la̍t ê lâng so͘-io, oe-bō--ê, in-ūi in chió, chiū soah; tùi thang-á khòaⁿ--chhut-khì--ê lóng o͘-àm;

4thàng街路ê門關teh，挨磨ê聲細細；鳥á一下哮，人就起來；唱歌ê cha-bó͘-gín-ná也lóng降低；thàng ke-lō͘ ê mn̂g koaiⁿ--teh, oe-bō ê siaⁿ sòe-sòe; chiáu-á chi̍t-ē háu, lâng chiū khí-lâi; chhiùⁿ-koa ê cha-bó͘-gín-ná iā lóng kàng-kē;

5見tio̍h高就驚，tī路中也有所驚畏；杏樹開花，草蜢做重擔，慾心lóng無去；因為人歸tī伊永遠ê厝，哀哭ê人往來tī街路；kìⁿ-tio̍h koâiⁿ chiū kiaⁿ, tī lō͘-tiong iā ū só͘ kiaⁿ-ùi; hēng-chhiū khui hoe, chháu-meh chòe tāng-tàⁿ, io̍k-sim lóng bô--khì; in-ūi lâng kui tī i éng-oán ê chhù, ai-khàu ê lâng óng-lâi tī ke-lō͘;

6當銀鍊á未斷，金碗未破，tī水泉邊ê水瓶未損壞，ka-lak未pháiⁿ tī井頂；tng gûn-liān-á bē tn̄g, kim-óaⁿ bē phòa, tī chúi-chôaⁿ-piⁿ ê chúi-pân bē sún-hoāi, ka-lak bē pháiⁿ tī chíⁿ-téng;

7塵埃歸土來返本，靈魂歸tī hō͘伊來ê上帝ê事先，tio̍h記念創造你ê主。tîn-ai kui thô͘ lâi hoán-pún, lêng-hûn kui tī hō͘ i lâi ê Siōng-tè ê tāi-seng, tio̍h kì-liām chhòng-chō lí ê Chú.

8傳道ê講，空虛ê空虛，凡事lóng是空虛。Thoân-tō--ê kóng, Khang-hu ê khang-hu, hoân-sū lóng sī khang-hu.

9Koh因為傳道ê有智慧，伊猶原教示百姓知bat；也靜靜想，查考，koh照次序排列chōe-chōe箴言。Koh in-ūi Thoân-tō--ê ū tì-hūi, i iû-goân kà-sī peh-sìⁿ chai-bat; iā chēng-chēng siūⁿ, chhâ-khó, koh chiàu chhù-sū pâi-lia̍t chōe-chōe chim-giân.

10傳道ê專心chhē thang歡喜ê話，是照正直寫ê誠實話。Thoân-tō--ê choan-sim chhē thang hoaⁿ-hí ê ōe, sī chiàu chèng-ti̍t siá ê sêng-si̍t ōe.

11智慧ê人ê話親像刺；會長ê話親像釘tiâu ê燈，lóng是tùi一個牧者所賜ê。Tì-hūi ê lâng ê ōe chhin-chhiūⁿ chhì; hōe-tiúⁿ ê ōe chhin-chhiūⁿ tèng-tiâu ê teng, lóng sī tùi chi̍t ê bo̍k-chiá só͘ sù ê.

12我ê kiáⁿ ah，iáu有一層，你tio̍h受勸解；著冊chōe，無窮盡；讀冊chōe，身軀會厭倦。Góa ê kiáⁿ ah, iáu ū chi̍t-chân, lí tio̍h siū khoàn-kài; tù chheh chōe, bô kiông-chīn; tha̍k-chheh chōe, seng-khu ōe ià-siān.

13Chiah-ê事lóng已經聽了lah；結尾就是敬畏上帝，謹慎守祂ê誡命；這就是人齊備ê本份。Chiah ê sū lóng í-keng thiaⁿ-liáu lah; kiat-bé chiū-sī kèng-ùi Siōng-tè, kín-sīn siú I ê kài-bēng; che chiū-sī lâng chiâu-pī ê pún-hūn.

14因為見所做ê kap一切隱密ê事，無論是好是pháiⁿ，上帝lóng beh審判。In-ūi kìⁿ só͘-chòe-ê kap it-chhè ún-ba̍t ê sū, bô-lūn sī hó sī pháiⁿ, Siōng-tè lóng beh sím-phòaⁿ.

1所羅門詩歌中ê雅歌。Só͘-lô-bûn si-koa-tiong ê Ngá-ko.

2願伊用伊ê嘴來chim我，　　因為你ê愛情比酒khah好。Goān i ēng i ê chhùi lâi chim góa, In-ūi lí ê ài-chêng pí chiú khah-hó.

3你ê膏油蜂koh好；　　你ê名親像倒出來ê膏油；　　所以眾cha-bó͘-gín-ná lóng疼你。Lí ê ko-iû phang koh hó; Lí ê miâ chhin-chhiūⁿ tò--chhut-lâi ê ko-iû; Só͘-í chèng cha-bó͘-gín-ná lóng thiàⁿ lí.

4願你牽我，阮就走來tè你；　　王chhōa我入伊ê房內；　　阮beh因為你來歡喜快樂，　　阮beh記念你ê愛情，贏過好酒；　　In疼你是應該ê。Goān lí khan góa, goán chiū cháu lâi tè lí; Ông chhōa góa ji̍p i ê pâng-lāi; Goán beh in-ūi lí lâi hoaⁿ-hí khoài-lo̍k, Goán beh kì-liām lí ê ài-chêng, iâⁿ-kè hó chiú; In thiàⁿ lí sī eng-kai ê.

5耶路撒冷ê眾cha-bó͘-gín-ná ah，　　我是烏，iáu-kú 生做好，　　親像Ki-ta̍t ê布棚，　　親像所羅門ê帳籬。Iâ-lō͘-sat-léng ê chèng cha-bó͘-gín-ná ah, Góa sī o͘, iáu-kú siⁿ-chòe hó, Chhin-chhiūⁿ Ki-ta̍t ê pò͘-pîⁿ, Chhin-chhiūⁿ Só͘-lô-bûn ê tiùⁿ-lî.

6M̄-thang看我厘á烏色，是因為日曝我，　　我ê老母chiah-ê kiáⁿ bat受氣我，　　In hō͘我顧守葡萄園；　　總是我家己ê葡萄園，我無顧守。M̄-thang khòaⁿ góa lî-á o͘-sek, Sī in-ūi ji̍t pha̍k góa, Góa ê lāu-bú chiah ê kiáⁿ bat siū-khì góa, In hō͘ góa kò͘-siú phû-tô-hn̂g; Chóng-sī góa ka-kī ê phû-tô-hn̂g, góa bô kò͘-siú.

7我心所疼ê ah，求你kā我講，　　你tī甚麼所在飼羊，日中晝hō͘ in歇tī甚麼所在；　　Tī你同伴ê羊群ê邊á，　　我啥事親像罩面ê人ah？Góa sim só͘-thiàⁿ--ê ah, kiû lí kā góa kóng, Lí tī sím-mi̍h só͘-chāi chhī iûⁿ, ji̍t-tiong-tàu hō͘ in hioh tī sím-mi̍h só͘-chāi; Tī lí tâng-phōaⁿ ê iûⁿ-kûn ê piⁿ-á, Góa siáⁿ-sū chhin-chhiūⁿ tà-bīn ê lâng ah?

8女界中第一súi-ê ah，你若m̄知，　　做你出去，tè羊群ê腳跡去；　　飼你ê山羊á，tī牧者ê布棚邊。Lú-kài-tiong tē-it súi--ê ah, lí nā m̄-chai, Chòe lí chhut-khì, tè iûⁿ-kûn ê kha-jiah khì; Chhī lí ê soaⁿ-iûⁿ-á, tī bo̍k-chiá ê pò͘-pîⁿ-piⁿ.

9我所疼ê，我比並你，　　親像法老ê車ê馬。Góa só͘ thiàⁿ--ê, góa pí-phēng lí, Chhin-chhiūⁿ Hoat-ló ê chhia ê bé.

10你鬢邊ê毛辮真súi，　　你ê頷頸掛珍珠ê鍊á，真好看。Lí pìn-piⁿ ê mn̂g pīⁿ chin-súi, Lí ê ām-kún kòa chin-chu ê liān-á, chin hó-khòaⁿ.

11阮beh kā你做金鍊á，鑲銀鈕á。Goán beh kā lí chòe kim-liān-á, Siuⁿ gûn liú-á.

12王坐伊ê桌ê時，　　我ná-ta̍t ê香油chhèng出伊ê芳味。Ông chē i ê toh ê sî, Góa ná-ta̍t ê hiuⁿ-iû chhèng-chhut i ê phang-bī.

13我所戀愛ê是做我一包ê沒藥，　　帶tī我ê胸前。Góa só͘ loân-ài-ê sī chòe góa chi̍t-pau ê bu̍t-io̍h, Tòa tī góa ê heng-chêng.

14我所戀愛ê，是做我一pha ê指甲花，　　Tī Ún-kî-tí ê葡萄園內。Góa só͘ loân-ài-ê, sī chòe góa chi̍t-pha ê chńg-kah-hoe, Tī Ún-kî-tí ê phû-tô-hn̂g-lāi.

15我所疼ê，看ah，你真súi；看ah，你真súi；　　你ê目睭親像鴿。Góa só͘ thiàⁿ-ê, khòaⁿ ah, lí chin súi; khòaⁿ ah, lí chin súi; Lí ê ba̍k-chiu chhin-chhiūⁿ kap.

16我所戀愛ê ah，看ah，你真súi，實在thang歡喜；　　咱ê眠床lóng是青綠ê色。Góa só͘ loân-ài-ê ah, khòaⁿ ah, lí chin súi, si̍t-chāi thang hoaⁿ-hí; Lán ê bîn-chhn̂g lóng sī chhiⁿ-le̍k ê sek.

17咱ê厝ê楹á是柏香柴，　　伊ê角á是松柏柴。Lán ê chhù ê îⁿ-á sī pek-hiuⁿ-chhâ, I ê ka̍k(**kak)-á sī siông-peh-chhâ.

1我是Sa-lûn ê玫瑰花，　　是山谷中ê百合花。Góa sī Sa-lûn ê mûi-khùi-hoe, Sī soaⁿ-kok tiong ê pek-ha̍p-hoe.

2我所疼ê tī chiah-ê cha-bó͘-kiáⁿ ê中間，　　親像刺á內ê百合花。Góa só͘ thiàⁿ-ê tī chiah ê cha-bó͘-kiáⁿ ê tiong-kan, Chhin-chhiūⁿ chhì-á-lāi ê pek-ha̍p-hoe.

3我所戀愛ê，tī chiah-ê ta-po͘-kiáⁿ ê中間，　　親像樹林中ê蘋果樹；　　我真歡喜坐tī伊ê蔭影；伊ê果子我食了真甜。Góa só͘ loân-ái-ê, tī chiah ê ta-po͘-kiáⁿ ê tiong-kan, Chhin-chhiūⁿ chhiū-nâ-tiong ê pîn-kó chhiū; Góa chin hoaⁿ-hí chē tī i ê ìm-ńg; I ê ké-chí góa chia̍h-liáu chin tiⁿ.

4伊chhōa我入筵席ê所在，　　用疼做旗tī我ê頂面。I chhōa góa ji̍p iân-sia̍h ê só͘-chāi, Ēng thiàⁿ chòe kî tī góa ê téng-bīn.

5求lín用葡萄餅來補我ê力，用蘋果來養我精神；　　因為我tùi愛情來致病。Kiû lín ēng phû-tô-piáⁿ lâi pó͘ góa ê la̍t, ēng pîn-kó lâi ióng góa cheng-sîn; In-ūi góa tùi ài-chêng lâi tì-pīⁿ.

6伊ê tò手phô͘我ê頭殼，　　伊ê chiàⁿ手抱我。I ê tò-chhiú phô͘ góa ê thâu-khak, I ê chiàⁿ-chhiú phō góa.

7耶路撒冷ê眾cha-bó͘-gín-ná ah，　　我kí羚羊以及田野ê鹿母，切切吩咐你，　　莫得phah醒伊，莫得攪擾我所疼ê，　　thèng候伊家己情願。Iâ-lō͘-sat-léng ê chèng cha-bó͘-gín-ná ah, Góa kí lêng-iông í-ki̍p tiân-iá ê lo̍k-bú, chhiat-chhiat hoan-hù lí, Bo̍h-tit phah-chhíⁿ i, bo̍h-tit kiáu-jiáu góa só͘-thiàⁿ-ê, Thèng-hāu i ka-kī chêng-goān.

8Ā，我所戀愛ê ê聲看ah，伊來lah；　　Tiô tī山裡，跳tī嶺裡。Ā, góa só͘ loân-ài--ê ê siaⁿ khòaⁿ ah, i lâi lah; Tiô tī soaⁿ--nih, thiàu tī niá--nih.

9我所戀愛ê，親像羚羊á是鹿á；　　看ah，伊khiā tī阮ê牆壁後；　　Tùi窗á teh看；　　Tùi窗á-chí teh探。Góa só͘ loân-ài-ê, chhin-chhiūⁿ lêng-iông á-sī lo̍k-á; Khòaⁿ ah, i khiā tī goán ê chhiûⁿ-piah-āu; Tùi thang-á teh khòaⁿ; Tùi thang-á-chí teh thàm.

10我所戀愛ê出聲對我講，　　我所疼ê，我ê美人，起來kap我相kap去。Góa só͘ loân-ài-ê chhut-siaⁿ tùi góa kóng, Góa só͘-thiàⁿ-ê, góa ê bí-jîn, khí-lâi kap góa saⁿ-kap khì.

11看ah，因為冬天已經過，　　雨已經晴(chîⁿ)，soah lah。Khòaⁿ ah, in-ūi tang-thiⁿ í-keng kè, Hō͘ í-keng chîⁿ, soah lah.

12遍地ê花已經開，　　鳥á哮ê時到lah；　　Tī咱ê境內聽見ka-chui ê聲。Piàn-tōe ê hoe í-keng khui, Chiáu-á háu ê sî kàu lah; Tī lán ê kéng-lāi thiaⁿ-kìⁿ ka-chui ê siaⁿ.

13無花果樹ê果子漸漸成熟，　　葡萄樹開花吐出伊ê芳；　　我所疼ê，我ê 美人，起來kap我相kap去。Bû-hoa-kó chhiū ê ké-chí chiām-chiām sêng-se̍k, Phû-tô-chhiū khui-hoe thò͘-chhut i ê phang; Góa só͘-thiàⁿ-ê, góa ê bí-jîn, khí-lâi kap góa saⁿ-kap khì.

14我ê鴿ah，你tī石縫內，tī山巖隱密ê所在；　　求你准我看見你ê面，聽見你ê聲；　　因為你ê聲溫和，你ê面生做súi。Góa ê kap ah, lí tī chio̍h-phāng-lāi, tī soaⁿ-gâm ún-ba̍t ê só͘-chāi; Kiû lí chún góa khòaⁿ-kìⁿ lí ê bīn, thiaⁿ-kìⁿ lí ê siaⁿ; In-ūi lí ê siaⁿ un-hô, lí ê bīn siⁿ-chòe súi.

15Tio̍h kā阮掠狐狸，細隻狐狸，就是敗壞葡萄園ê；　　因為阮ê葡萄tú-á beh開花。Tio̍h kā goán lia̍h hô͘-lî, sòe chiah hô͘-lî, chiū-sī pāi-hoāi phû-tô-hn̂g ê; In-ūi goán ê phû-tô tú-á beh khui-hoe.

16我所戀愛ê屬我，我也屬伊，　　伊tī百合花中飼伊ê羊群。Góa só͘ loân-ài-ê sio̍k góa, góa iā sio̍k i, I tī pek-ha̍p-hoe tiong chhī i ê iûⁿ-kûn.

17我所戀愛ê ah，願你日涼冷，影伸長ê時，倒tńg來。　　親像羚羊á是鹿á，　　Tī Pek-te̍k ê山裡。Góa só͘ loân-ài-ê ah, goān lí ji̍t liâng-léng, iáⁿ chhun-tn̂g ê sî, tò-tńg lâi. Chhin-chhiūⁿ lêng-iông á-sī lo̍k-á, Tī Pek-te̍k ê soaⁿ--nih.