1我是Sa-lûn ê玫瑰花，　　是山谷中ê百合花。Góa sī Sa-lûn ê mûi-khùi-hoe, Sī soaⁿ-kok tiong ê pek-ha̍p-hoe.

2我所疼ê tī chiah-ê cha-bó͘-kiáⁿ ê中間，　　親像刺á內ê百合花。Góa só͘ thiàⁿ-ê tī chiah ê cha-bó͘-kiáⁿ ê tiong-kan, Chhin-chhiūⁿ chhì-á-lāi ê pek-ha̍p-hoe.

3我所戀愛ê，tī chiah-ê ta-po͘-kiáⁿ ê中間，　　親像樹林中ê蘋果樹；　　我真歡喜坐tī伊ê蔭影；伊ê果子我食了真甜。Góa só͘ loân-ái-ê, tī chiah ê ta-po͘-kiáⁿ ê tiong-kan, Chhin-chhiūⁿ chhiū-nâ-tiong ê pîn-kó chhiū; Góa chin hoaⁿ-hí chē tī i ê ìm-ńg; I ê ké-chí góa chia̍h-liáu chin tiⁿ.

4伊chhōa我入筵席ê所在，　　用疼做旗tī我ê頂面。I chhōa góa ji̍p iân-sia̍h ê só͘-chāi, Ēng thiàⁿ chòe kî tī góa ê téng-bīn.

5求lín用葡萄餅來補我ê力，用蘋果來養我精神；　　因為我tùi愛情來致病。Kiû lín ēng phû-tô-piáⁿ lâi pó͘ góa ê la̍t, ēng pîn-kó lâi ióng góa cheng-sîn; In-ūi góa tùi ài-chêng lâi tì-pīⁿ.

6伊ê tò手phô͘我ê頭殼，　　伊ê chiàⁿ手抱我。I ê tò-chhiú phô͘ góa ê thâu-khak, I ê chiàⁿ-chhiú phō góa.

7耶路撒冷ê眾cha-bó͘-gín-ná ah，　　我kí羚羊以及田野ê鹿母，切切吩咐你，　　莫得phah醒伊，莫得攪擾我所疼ê，　　thèng候伊家己情願。Iâ-lō͘-sat-léng ê chèng cha-bó͘-gín-ná ah, Góa kí lêng-iông í-ki̍p tiân-iá ê lo̍k-bú, chhiat-chhiat hoan-hù lí, Bo̍h-tit phah-chhíⁿ i, bo̍h-tit kiáu-jiáu góa só͘-thiàⁿ-ê, Thèng-hāu i ka-kī chêng-goān.

8Ā，我所戀愛ê ê聲看ah，伊來lah；　　Tiô tī山裡，跳tī嶺裡。Ā, góa só͘ loân-ài--ê ê siaⁿ khòaⁿ ah, i lâi lah; Tiô tī soaⁿ--nih, thiàu tī niá--nih.

9我所戀愛ê，親像羚羊á是鹿á；　　看ah，伊khiā tī阮ê牆壁後；　　Tùi窗á teh看；　　Tùi窗á-chí teh探。Góa só͘ loân-ài-ê, chhin-chhiūⁿ lêng-iông á-sī lo̍k-á; Khòaⁿ ah, i khiā tī goán ê chhiûⁿ-piah-āu; Tùi thang-á teh khòaⁿ; Tùi thang-á-chí teh thàm.

10我所戀愛ê出聲對我講，　　我所疼ê，我ê美人，起來kap我相kap去。Góa só͘ loân-ài-ê chhut-siaⁿ tùi góa kóng, Góa só͘-thiàⁿ-ê, góa ê bí-jîn, khí-lâi kap góa saⁿ-kap khì.

11看ah，因為冬天已經過，　　雨已經晴(chîⁿ)，soah lah。Khòaⁿ ah, in-ūi tang-thiⁿ í-keng kè, Hō͘ í-keng chîⁿ, soah lah.

12遍地ê花已經開，　　鳥á哮ê時到lah；　　Tī咱ê境內聽見ka-chui ê聲。Piàn-tōe ê hoe í-keng khui, Chiáu-á háu ê sî kàu lah; Tī lán ê kéng-lāi thiaⁿ-kìⁿ ka-chui ê siaⁿ.

13無花果樹ê果子漸漸成熟，　　葡萄樹開花吐出伊ê芳；　　我所疼ê，我ê 美人，起來kap我相kap去。Bû-hoa-kó chhiū ê ké-chí chiām-chiām sêng-se̍k, Phû-tô-chhiū khui-hoe thò͘-chhut i ê phang; Góa só͘-thiàⁿ-ê, góa ê bí-jîn, khí-lâi kap góa saⁿ-kap khì.

14我ê鴿ah，你tī石縫內，tī山巖隱密ê所在；　　求你准我看見你ê面，聽見你ê聲；　　因為你ê聲溫和，你ê面生做súi。Góa ê kap ah, lí tī chio̍h-phāng-lāi, tī soaⁿ-gâm ún-ba̍t ê só͘-chāi; Kiû lí chún góa khòaⁿ-kìⁿ lí ê bīn, thiaⁿ-kìⁿ lí ê siaⁿ; In-ūi lí ê siaⁿ un-hô, lí ê bīn siⁿ-chòe súi.

15Tio̍h kā阮掠狐狸，細隻狐狸，就是敗壞葡萄園ê；　　因為阮ê葡萄tú-á beh開花。Tio̍h kā goán lia̍h hô͘-lî, sòe chiah hô͘-lî, chiū-sī pāi-hoāi phû-tô-hn̂g ê; In-ūi goán ê phû-tô tú-á beh khui-hoe.

16我所戀愛ê屬我，我也屬伊，　　伊tī百合花中飼伊ê羊群。Góa só͘ loân-ài-ê sio̍k góa, góa iā sio̍k i, I tī pek-ha̍p-hoe tiong chhī i ê iûⁿ-kûn.

17我所戀愛ê ah，願你日涼冷，影伸長ê時，倒tńg來。　　親像羚羊á是鹿á，　　Tī Pek-te̍k ê山裡。Góa só͘ loân-ài-ê ah, goān lí ji̍t liâng-léng, iáⁿ chhun-tn̂g ê sî, tò-tńg lâi. Chhin-chhiūⁿ lêng-iông á-sī lo̍k-á, Tī Pek-te̍k ê soaⁿ--nih.

1我暝時the tī我ê眠床，chhē我ê心所疼ê，　　我chhē伊，也chhē-bōe-tio̍h。Góa mî--sî the tī góa ê bîn-chhn̂g, chhē góa ê sim só͘-thiàⁿ--ê, Góa chhē i, iā chhē-bōe-tio̍h.

2Taⁿ我beh起來四界行tī城內，　　Tī街路，tī寬闊ê所在，　　我beh chhē我ê心所疼ê；　　我chhē伊也chhē-bōe-tio̍h。Taⁿ góa beh khí-lâi sì-kòe kiâⁿ tī siâⁿ-lāi, Tī ke-lō͘, tī khoan-khoah ê só͘-chāi, Góa beh chhē góa ê sim só͘-thiàⁿ-ê; Góa chhē i iā chhē-bōe-tio̍h.

3城內巡查ê人tú-tio̍h我，　　我問in講，Lín有看見我心所疼ê á無？Siâⁿ-lāi sûn-cha ê lâng tú-tio̍h góa, Góa mn̄g in kóng, Lín ū khòaⁿ-kìⁿ góa sim só͘-thiàⁿ-ê á-bô?

4我離開in無jōa遠，　　就tú-tio̍h我ê心所疼ê，　　我擒伊，m̄ hō͘伊去；　　thèng候我chhōa伊入我老母ê家，　　就是生我ê ê房內。Góa lī-khui in bô jōa-hn̄g, Chiū tú-tio̍h góa ê sim só͘-thiàⁿ-ê, Góa khîⁿ i, m̄ hō͘ i khì; Thèng-hāu góa chhōa i ji̍p góa lāu-bú ê ke, Chiū-sī siⁿ-góa-ê ê pâng-lāi.

5耶路撒冷ê眾cha-bó͘-gín-ná ah，　　我kí羚羊以及田野ê鹿母，切切吩咐你，　　莫得phah醒伊，莫得攪擾我所疼ê；　　thèng候伊家己情願。Iâ-lō͘-sat-léng ê chèng cha-bó͘-gín-ná ah, Góa kí lêng-iông í-ki̍p tiân-iá ê lo̍k-bú, chhiat-chhiat hoan-hù lí, Bo̍h-tit phah-chhíⁿ i, bo̍h-tit kiáu-jiáu góa só͘-thiàⁿ-ê; Thèng-hāu i ka-kī chêng-goān.

6Hit-ê tùi曠野裡來，形狀親像火薰ê柱，　　用沒藥kap乳香，以及seng-lí人ta̍k樣ê芳粉來hō͘伊芳ê，　　是是誰 ah？Hit ê tùi khòng-iá--nih lâi, hêng-chōng chhin-chhiūⁿ hé-hun ê thiāu, Ēng bu̍t-io̍h kap jú-hiuⁿ, í-ki̍p seng-lí lâng ta̍k-iūⁿ ê phang-hún lâi hō͘ i phang-ê, Sī chī-chūi ah?

7看ah，是所羅門ê轎，　　四圍有六十個勇士，　　lóng是tùi以色列勇士中揀ê。Khòaⁿ ah, sī Só͘-lô-bûn ê kiō, Sì-ûi ū la̍k-cha̍p ê ióng-sū, Lóng sī tùi Í-sek-lia̍t ióng-sū-tiong kéng--ê.

8In lóng會曉用劍，gâu交戰，　　人人背刀tī腰裡，　　持防暝時ê危險。In lóng ōe hiáu ēng kiàm, gâu kau-chiàn, Lâng-lâng pē to tī io--nih, Tî-hông mî--sî ê gûi-hiám.

9所羅門王用黎巴嫩ê柴，　　為家己做一頂金輦。Só͘-lô-bûn ông ēng Lī-pa-lùn ê chhâ, Ūi ka-kī chòe chi̍t téng kim-lián.

10伊ê柱是用銀做ê，　　伊ê 底是用金做ê，　　伊ê墊是紫色ê，　　其中是用耶路撒冷ê眾cha-bó͘-gín-ná ê愛情鋪ê。I ê thiāu sī ēng gûn chòe--ê, I ê tóe sī ēng kim chòe ê, I ê tiām sī chí-sek-ê, Kî-tiong sī ēng Iâ-lō͘-sat-léng ê chèng cha-bó͘-gín-ná ê ài-chêng pho͘--ê.

11錫安ê眾cha-bó͘-gín-ná ah，lín tio̍h出去看所羅門王，　　伊戴冕旒，就是tī伊合婚ê日，伊ê心歡喜ê日，　　伊ê老母kā伊戴ê。Sek-an ê chèng cha-bó͘-gín-ná ah, lín tio̍h chhut-khì khòaⁿ Só͘-lô-bûn ông, I tì bián-liû, chiū-sī tī i ha̍p-hun ê ji̍t, i ê sim hoaⁿ-hí ê ji̍t, I ê lāu-bú kā i tì--ê.

1我所疼ê，看ah，你真súi，看ah，你真súi，　　Tī phè ê內面你ê目睭親像鴿；　　你ê頭毛親像山羊kui陣；　　倒tī Ki-lia̍t ê山邊。Góa só͘-thiàⁿ-ê, khòaⁿ ah, lí chin-súi, khòaⁿ ah, lí chin súi, Tī phè ê lāi-bīn lí ê ba̍k-chiu chhin-chhiūⁿ kap; Lí ê thâu-mn̂g chhin-chhiūⁿ soaⁿ-iûⁿ kui-tīn; Tó tī Ki-lia̍t ê soaⁿ-piⁿ.

2你ê嘴齒親像tú-á煎毛ê一群羊，洗清氣上來，　　Ta̍k隻有雙生kiáⁿ，無一隻失落伊ê kiáⁿ。Lí ê chhùi-khí chhin-chhiūⁿ tú-á chián-mn̂g ê chi̍t-kûn iûⁿ, sóe chheng-khì chiūⁿ--lâi, Ta̍k-chiah ū siang-siⁿ kiáⁿ, bô chi̍t-chiah sit-lo̍h i ê kiáⁿ.

3你ê嘴唇親像朱紅線，　　你ê嘴也生做好，　　你ê鬢邊tī phè內，　　親像一塊石榴。Lí ê chhùi-tûn chhin-chhiūⁿ chu-âng sòaⁿ, Lí ê chhùi iā siⁿ-chòe hó, Lí ê pìn-piⁿ tī phè-lāi, Chhin-chhiūⁿ chi̍t-tè sia̍h-liû.

4你ê頷頸親像大衛ê台，起做軍藏局；　　壁頂吊一千個屏牌，　　lóng是勇士ê藤牌。Lí ê ām-kún chhin-chhiūⁿ Tāi-pi̍t ê tâi, khí chòe kun-chong(**chông)-ke̍k; Piah-téng tiàu chi̍t-chheng ê pîn-pâi, Lóng sī ióng-sū ê tîn-pâi.

5你ê兩個奶，親像一對鹿á，　　食草tī百合花中，　　就是鹿母雙生ê。Lí ê nn̄g ê lin, chhin-chhiūⁿ chi̍t-tùi lo̍k-á, Chia̍h-chháu tī pek-ha̍p-hoe-tiong, Chiū-sī lo̍k-bú siang-siⁿ--ê.

6到日涼冷，影伸長ê時，　　我beh去沒藥山，kap乳香ê山頭。Kàu ji̍t liâng-léng, iáⁿ chhun-tn̂g ê sî, Góa beh khì bu̍t-io̍h soaⁿ, kap jú-hiuⁿ ê soaⁿ-thâu.

7我所疼ê，你完全súi，　　你無一點á瑕疵。Góa só͘-thiàⁿ-ê, lí oân-choân súi, Lí bô chi̍t-tiám-á hâ-chhû.

8我ê新娘，你tio̍h tùi黎巴嫩kap我來，tùi黎巴嫩kap我來，　　Tùi A-má-ná ê頂面，tùi Sī-nî-jíⁿ kap Hek-bûn ê頂面；　　tùi獅ê穴，tùi豹ê山看落去。Góa ê sin-niû, lí tio̍h tùi Lī-pa-lùn kap góa lâi, tùi Lī-pa-lùn kap góa lâi, Tùi A-má-ná ê téng-bīn, tùi Sī-nî-jíⁿ kap Hek-bûn ê téng-bīn; Tùi sai ê hia̍t, tùi pà ê soaⁿ khòaⁿ--lo̍h-khì.

9我ê小妹ah，我ê新娘ah，　　你奪我ê心，你用目睭一下看，　　用你ê頷頸ê一條金鍊á，奪我ê心。Góa ê sió-bē ah, góa ê sin-niû ah, Lí toa̍t góa ê sim, lí ēng ba̍k-chiu chi̍t-ē khòaⁿ, Ēng lí ê ām-kún ê chi̍t-tiâu kim-liān-á, toa̍t góa ê sim.

10我ê小妹，我ê新娘，你ê愛情怎樣hiah美妙。　　你ê愛情怎樣比酒khah好；　　你ê膏油ê芳味怎樣比一切ê香料khah贏。Góa ê sió-bē, góa ê sin-niû, lí ê ài-chêng cháiⁿ-iūⁿ hiah bí-biāu. Lí ê ài-chêng cháiⁿ-iūⁿ pí chiú khah-hó; Lí ê ko-iû ê phang-bī cháiⁿ-iūⁿ pí it-chhè ê hiuⁿ-liāu khah-iâⁿ.

11我ê新娘ah，你ê嘴唇親像蜜房teh滴，　　你ê舌下有蜜有奶；　　你ê衣服ê芳味親像黎巴嫩ê芳味。Góa ê sin-niû ah, lí ê chhùi-tûn chhin-chhiūⁿ bi̍t-pô͘ teh tih, Lí ê chi̍h-ē ū bi̍t ū ni; Lí ê i-ho̍k ê phang-bī chhin-chhiūⁿ Lī-pa-lùn ê phang-bī.

12我ê小妹，我ê新娘，就是關鎖ê園；　　蓋密ê井，封密ê水泉。Góa ê sió-bē, góa ê sin-niû, chiū-sī koaiⁿ-só ê hn̂g; Khàm-ba̍t ê chíⁿ, hong-ba̍t ê chúi-chôaⁿ.

13你所出是石榴ê園，有siōng好ê果子，　　指甲花kap ná-ta̍t ê樹。Lí só͘ chhut sī sia̍h-liû ê hn̂g, ū siōng-hó ê ké-chí, Chńg-kah-hoe kap ná-ta̍t ê chhiū.

14有ná-ta̍t kap番紅花，　　菖蒲kap肉桂，以及chiah-ê乳香、　　沒藥、沉香，kap一切上等ê香料。Ū ná-ta̍t kap hoan-âng-hoe, Chhiong-pô͘ kap jio̍k-kùi, í-ki̍p chiah ê jú-hiuⁿ, Bu̍t-io̍h, tîm-hiuⁿ, kap it-chhè siōng-téng ê hiuⁿ-liāu.

15你是園中ê水泉，活水ê井，　　Tùi黎巴嫩流落來ê溪水。Lí sī hn̂g-tiong ê chúi-chôaⁿ, oa̍h-chúi ê chíⁿ, Tùi Lī-pa-lùn lâu--lo̍h-lâi ê khoe-chúi.

16北風ah，tio̍h起來，南風ah，tio̍h來，　　吹來我ê園，hō͘伊ê芳味發出；　　願我所戀愛ê入伊ê園內，　　食伊好ê果子。Pak-hong ah, tio̍h khí-lâi, lâm-hong ah, tio̍h lâi, Chhe-lâi góa ê hn̂g, hō͘ i ê phang-bī hoat-chhut; Goān góa só͘ loân-ài-ê ji̍p i ê hn̂g-lāi, Chia̍h i hó ê ké-chí.