1我所疼ê，看ah，你真súi，看ah，你真súi，　　Tī phè ê內面你ê目睭親像鴿；　　你ê頭毛親像山羊kui陣；　　倒tī Ki-lia̍t ê山邊。Góa só͘-thiàⁿ-ê, khòaⁿ ah, lí chin-súi, khòaⁿ ah, lí chin súi, Tī phè ê lāi-bīn lí ê ba̍k-chiu chhin-chhiūⁿ kap; Lí ê thâu-mn̂g chhin-chhiūⁿ soaⁿ-iûⁿ kui-tīn; Tó tī Ki-lia̍t ê soaⁿ-piⁿ.

2你ê嘴齒親像tú-á煎毛ê一群羊，洗清氣上來，　　Ta̍k隻有雙生kiáⁿ，無一隻失落伊ê kiáⁿ。Lí ê chhùi-khí chhin-chhiūⁿ tú-á chián-mn̂g ê chi̍t-kûn iûⁿ, sóe chheng-khì chiūⁿ--lâi, Ta̍k-chiah ū siang-siⁿ kiáⁿ, bô chi̍t-chiah sit-lo̍h i ê kiáⁿ.

3你ê嘴唇親像朱紅線，　　你ê嘴也生做好，　　你ê鬢邊tī phè內，　　親像一塊石榴。Lí ê chhùi-tûn chhin-chhiūⁿ chu-âng sòaⁿ, Lí ê chhùi iā siⁿ-chòe hó, Lí ê pìn-piⁿ tī phè-lāi, Chhin-chhiūⁿ chi̍t-tè sia̍h-liû.

4你ê頷頸親像大衛ê台，起做軍藏局；　　壁頂吊一千個屏牌，　　lóng是勇士ê藤牌。Lí ê ām-kún chhin-chhiūⁿ Tāi-pi̍t ê tâi, khí chòe kun-chong(**chông)-ke̍k; Piah-téng tiàu chi̍t-chheng ê pîn-pâi, Lóng sī ióng-sū ê tîn-pâi.

5你ê兩個奶，親像一對鹿á，　　食草tī百合花中，　　就是鹿母雙生ê。Lí ê nn̄g ê lin, chhin-chhiūⁿ chi̍t-tùi lo̍k-á, Chia̍h-chháu tī pek-ha̍p-hoe-tiong, Chiū-sī lo̍k-bú siang-siⁿ--ê.

6到日涼冷，影伸長ê時，　　我beh去沒藥山，kap乳香ê山頭。Kàu ji̍t liâng-léng, iáⁿ chhun-tn̂g ê sî, Góa beh khì bu̍t-io̍h soaⁿ, kap jú-hiuⁿ ê soaⁿ-thâu.

7我所疼ê，你完全súi，　　你無一點á瑕疵。Góa só͘-thiàⁿ-ê, lí oân-choân súi, Lí bô chi̍t-tiám-á hâ-chhû.

8我ê新娘，你tio̍h tùi黎巴嫩kap我來，tùi黎巴嫩kap我來，　　Tùi A-má-ná ê頂面，tùi Sī-nî-jíⁿ kap Hek-bûn ê頂面；　　tùi獅ê穴，tùi豹ê山看落去。Góa ê sin-niû, lí tio̍h tùi Lī-pa-lùn kap góa lâi, tùi Lī-pa-lùn kap góa lâi, Tùi A-má-ná ê téng-bīn, tùi Sī-nî-jíⁿ kap Hek-bûn ê téng-bīn; Tùi sai ê hia̍t, tùi pà ê soaⁿ khòaⁿ--lo̍h-khì.

9我ê小妹ah，我ê新娘ah，　　你奪我ê心，你用目睭一下看，　　用你ê頷頸ê一條金鍊á，奪我ê心。Góa ê sió-bē ah, góa ê sin-niû ah, Lí toa̍t góa ê sim, lí ēng ba̍k-chiu chi̍t-ē khòaⁿ, Ēng lí ê ām-kún ê chi̍t-tiâu kim-liān-á, toa̍t góa ê sim.

10我ê小妹，我ê新娘，你ê愛情怎樣hiah美妙。　　你ê愛情怎樣比酒khah好；　　你ê膏油ê芳味怎樣比一切ê香料khah贏。Góa ê sió-bē, góa ê sin-niû, lí ê ài-chêng cháiⁿ-iūⁿ hiah bí-biāu. Lí ê ài-chêng cháiⁿ-iūⁿ pí chiú khah-hó; Lí ê ko-iû ê phang-bī cháiⁿ-iūⁿ pí it-chhè ê hiuⁿ-liāu khah-iâⁿ.

11我ê新娘ah，你ê嘴唇親像蜜房teh滴，　　你ê舌下有蜜有奶；　　你ê衣服ê芳味親像黎巴嫩ê芳味。Góa ê sin-niû ah, lí ê chhùi-tûn chhin-chhiūⁿ bi̍t-pô͘ teh tih, Lí ê chi̍h-ē ū bi̍t ū ni; Lí ê i-ho̍k ê phang-bī chhin-chhiūⁿ Lī-pa-lùn ê phang-bī.

12我ê小妹，我ê新娘，就是關鎖ê園；　　蓋密ê井，封密ê水泉。Góa ê sió-bē, góa ê sin-niû, chiū-sī koaiⁿ-só ê hn̂g; Khàm-ba̍t ê chíⁿ, hong-ba̍t ê chúi-chôaⁿ.

13你所出是石榴ê園，有siōng好ê果子，　　指甲花kap ná-ta̍t ê樹。Lí só͘ chhut sī sia̍h-liû ê hn̂g, ū siōng-hó ê ké-chí, Chńg-kah-hoe kap ná-ta̍t ê chhiū.

14有ná-ta̍t kap番紅花，　　菖蒲kap肉桂，以及chiah-ê乳香、　　沒藥、沉香，kap一切上等ê香料。Ū ná-ta̍t kap hoan-âng-hoe, Chhiong-pô͘ kap jio̍k-kùi, í-ki̍p chiah ê jú-hiuⁿ, Bu̍t-io̍h, tîm-hiuⁿ, kap it-chhè siōng-téng ê hiuⁿ-liāu.

15你是園中ê水泉，活水ê井，　　Tùi黎巴嫩流落來ê溪水。Lí sī hn̂g-tiong ê chúi-chôaⁿ, oa̍h-chúi ê chíⁿ, Tùi Lī-pa-lùn lâu--lo̍h-lâi ê khoe-chúi.

16北風ah，tio̍h起來，南風ah，tio̍h來，　　吹來我ê園，hō͘伊ê芳味發出；　　願我所戀愛ê入伊ê園內，　　食伊好ê果子。Pak-hong ah, tio̍h khí-lâi, lâm-hong ah, tio̍h lâi, Chhe-lâi góa ê hn̂g, hō͘ i ê phang-bī hoat-chhut; Goān góa só͘ loân-ài-ê ji̍p i ê hn̂g-lāi, Chia̍h i hó ê ké-chí.

1我ê小妹，我ê新娘ah，我入我ê園內，　　挽我ê沒藥kap我ê香料，　　食我ê蜜pô͘ kap我ê蜜；　　Lim我ê酒kap我ê奶；　　我chiah-ê朋友，tio̍h來食；　　我所戀愛ê，來lim，koh lim chōe-chōe。Góa ê sió-bē, góa ê sin-niû ah, góa ji̍p góa ê hn̂g-lāi, Bán góa ê bu̍t-io̍h kap góa ê hiuⁿ-liāu, Chia̍h góa ê bi̍t-pô͘ kap góa ê bi̍t; Lim góa ê chiú kap góa ê ni; Góa chiah ê pêng-iú, tio̍h lâi chia̍h; Góa só͘ loân-ài-ê, lâi lim, koh lim chōe-chōe.

2我睏，我ê心iáu精神；　　這是我戀愛ê ê聲，伊phah門，講，　　我ê小妹，我所疼ê，我ê鴿，　　我ê純全ê，求你kā我開門；　　因為我ê頭殼露水滿滿；　　我ê頭毛hō͘暝時ê露水滴tâm。Góa khùn, góa ê sim iáu cheng-sîn; Che sī góa loân-ài-ê ê siaⁿ, i phah-mn̂g, kóng, Góa ê sió-bē, góa só͘ thiàⁿ-ê, góa ê kap, Góa ê sûn-choân-ê, kiû lí kā góa khui-mn̂g; In-ūi góa ê thâu-khak lō͘-chúi móa-móa; Góa ê thâu-mn̂g hō͘ mî--sî ê lō͘-chúi tih-tâm.

3我已經thǹg我ê衫，beh怎樣koh穿？　　我已經洗我ê腳，怎樣thang koh phah lâ-sâm ah？Góa í-keng thǹg góa ê saⁿ, beh cháiⁿ-iūⁿ koh chhēng? Góa í-keng sóe góa ê kha, cháiⁿ-iūⁿ thang koh phah lâ-sâm ah?

4我所戀愛ê，tùi門孔伸手入來；　　我ê心腸為tio̍h伊來激動。Góa só͘ loân-ài--ê, tùi mn̂g-khang chhun-chhiú ji̍p--lâi; Góa ê sim-tn̂g ūi-tio̍h i lâi kek-tōng.

5我起來，beh kā我所戀愛ê開門；　　我ê兩支手ê沒藥滴落去，　　我ê指頭á有沒藥汁滴tī門閂柄。Góa khí-lâi, beh kā góa só͘ loân-ài-ê khui-mn̂g; Góa ê nn̄g ki chhiú ê bu̍t-io̍h tih--lo̍h-khì, Góa ê chńg-thâu-á ū bu̍t-io̍h-chiap tih tī mn̂g-chhòaⁿ pìⁿ.

6我kā我所戀愛ê開門；　　總是我所戀愛ê已經oa̍t-tńg身去lah；　　我為tio̍h伊ê話，神不附體；　　我chhē伊也chhē-bōe-tio̍h；我叫伊，伊也無應。Góa kā góa só͘ loân-ài-ê khui-mn̂g; Chóng-sī góa só͘ loân-ài-ê í-keng oa̍t-tńg-sin khì lah; Góa ūi-tio̍h i ê ōe, sîn put-hū-thé; Góa chhē i iā chhē-bōe-tio̍h; góa kiò i, i iā bô ìn.

7城內巡查ê人tú-tio̍h我，　　Phah我，傷我；　　顧城牆ê人搶我moa身軀ê巾。Siâⁿ-lāi sûn-cha ê lâng tú-tio̍h góa, Phah góa, siong góa; Kò͘ siâⁿ-chhiûⁿ ê lâng chhiúⁿ góa moa seng-khu ê kun.

8耶路撒冷ê眾cha-bó͘-gín-ná ah，　　我切切吩咐你，若tú-tio̍h我所戀愛ê，tio̍h kā伊講，　　我因為愛情致病。Iâ-lō͘-sat-léng ê chèng cha-bó͘-gín-ná ah, Góa chhiat-chhiat hoan-hù lí, nā tú-tio̍h góa só͘ loân-ài-ê, tio̍h kā i kóng, Góa in-ūi ài-chêng tì-pīⁿ.

9你chit-ê女界中第一súi-ê ah，　　你所戀愛ê，比別ê所戀愛ê有甚麼khah贏？　　你所戀愛ê，比別ê所戀愛ê有甚麼khah贏，　　你chiah án-ni切切吩咐阮？Lí chit ê lú-kài-tiong tē-it súi-ê ah, Lí só͘ loân-ài-ê, pí pa̍t-ê só͘ loân-ài-ê ū sím-mi̍h khah-iâⁿ? Lí só͘ loân-ài-ê, pí pa̍t-ê só͘ loân-ài-ê ū sím-mi̍h khah-iâⁿ, Lí chiah án-ni chhiat-chhiat hoan-hù goán?

10我所戀愛ê，是白koh紅，　　是萬人中ê第一個。Góa só͘ loân-ài-ê, sī pe̍h koh âng, Sī bān-lâng-tiong ê tē-it-ê.

11伊ê頭殼親像siōng好ê金，　　伊ê頭毛垂落來，烏親像烏鴉。I ê thâu-khak chhin-chhiūⁿ siōng-hó ê kim, I ê thâu-mn̂g sûi--lo̍h-lâi, o͘ chhin-chhiūⁿ o͘-a.

12伊ê目睭親像溪邊ê鴿，　　用奶洗伊，安置合適。I ê ba̍k-chiu chhin-chhiūⁿ khoe-piⁿ ê kap, Ēng ni sóe i, an-tì ha̍p-sek.

13伊ê嘴phóe親像芳花kui排，親像芳草ê台，　　伊ê嘴唇親像百合花，koh滴落沒藥汁。I ê chhùi-phóe chhin-chhiūⁿ phang-hoe kui-pâi, chhin-chhiūⁿ phang-chháu ê tâi, I ê chhùi-tûn chhin-chhiūⁿ pek-ha̍p-hoe, koh tih-lo̍h bu̍t-io̍h-chiap.

14伊ê兩手親像金環鑲黃玉；　　伊ê身軀親像雕刻ê象牙，周圍鑲藍寶石。I ê nn̄g-chhiú chhin-chhiūⁿ kim-khoân siuⁿ n̂g-ge̍k; I ê seng-khu chhin-chhiūⁿ tiau-khek ê chhiūⁿ-gê, chiu-ûi siuⁿ lâm-pó-chio̍h.

15伊ê腳腿親像矽石，安tī好金ê座；　　伊ê款式親像黎巴嫩，　　Koh真súi親像柏香樹。I ê kha-thúi chhin-chhiūⁿ sia̍h-chio̍h, an tī hó-kim ê chō; I ê khoán-sit chhin-chhiūⁿ Lī-pa-lùn, Koh chin-súi chhin-chhiūⁿ pek-hiuⁿ-chhiū.

16伊ê話極其甜，伊完全thang疼；　　耶路撒冷ê眾cha-bó͘-gín-ná ah，　　這是我所戀愛ê，這是我ê朋友。I ê ōe ke̍k-kî tiⁿ, i oân-choân thang thiàⁿ; Iâ-lō͘-sat-léng ê chèng cha-bó͘-gín-ná ah, Che sī góa só͘ loân-ài-ê, che sī góa ê pêng-iú.

1你chit-ê女界中第一súi-ê ah，　　你所戀愛ê氣toh-lo̍h？　　你所戀愛ê oa̍t-tńg去toh-lo̍h，　　Hō͘阮thang kap你去chhē伊？Lí chit ê lú-kài-tiong tē-it súi-ê ah, Lí só͘ loân-ài--ê khì toh-lo̍h? Lí só͘ loân-ài--ê oa̍t-tńg khì toh-lo̍h, Hō͘ goán thang kap lí khì chhē i?

2我所戀愛ê落去伊ê園，　　到芳花kui排，tī園內飼羊群，　　Koh挽百合花。Góa só͘ loân-ài-ê lo̍h--khì i ê hn̂g, Kàu phang-hoe kui-pâi, tī hn̂g-lāi chhī iûⁿ-kûn, Koh bán pek-ha̍p-hoe.

3我屬我所戀愛ê，我所戀愛ê也屬我；　　伊tī百合花ê中間飼羊群。Góa sio̍k góa só͘ loân-ài-ê, góa só͘ loân-ài-ê iā sio̍k góa; I tī pek-ha̍p-hoe ê tiong-kan chhī iûⁿ-kûn.

4我所疼ê ah，你súi親像Tek-sat，　　生做好親像耶路撒冷，　　威儀親像kia̍h大旗ê軍隊。Góa só͘-thiàⁿ-ê ah, lí súi chhin-chhiūⁿ Tek-sat, Siⁿ-chòe hó chhin-chhiūⁿ Iâ-lō͘-sat-léng, Ui-gî chhin-chhiūⁿ kia̍h tōa-kî ê kun-tūi.

5你ê目睭m̄-thang看我，　　因為會奪我ê心神；　　你ê頭毛親像山羊kui陣，　　倒tī Ki-lia̍t ê山邊。Lí ê ba̍k-chiu m̄-thang khòaⁿ góa, In-ūi ōe toa̍t góa ê sim-sîn; Lí ê thâu-mn̂g chhin-chhiūⁿ soaⁿ-iûⁿ kui-tīn, Tó tī Ki-lia̍t ê soaⁿ-piⁿ.

6你ê嘴齒親像kui陣ê羊母，　　洗清氣上來；　　Ta̍k隻有雙生kiáⁿ，　　無一隻失落伊ê kiáⁿ。Lí ê chhùi-khí chhin-chhiūⁿ kui-tīn ê iûⁿ-bú, Sóe chheng-khì chiūⁿ-lâi; Ta̍k-chiah ū siang-siⁿ kiáⁿ, Bô chi̍t-chiah sit-lo̍h i ê kiáⁿ.

7你ê鬢邊tī phè內，　　親像一塊石榴。Lí ê pìn-piⁿ tī phè-lāi, Chhin-chhiūⁿ chi̍t-tè sia̍h-liû.

8有六十ê王后，八十個嬪妃，　　也有算bōe了ê宮女。Ū la̍k-cha̍p ê ông-hō͘, poeh-cha̍p ê pīn-hui, Iā ū sǹg-bōe-liáu ê kiong-lú.

9我ê鴿，我ê純全ê，是獨一ê；　　伊是伊ê老母獨生ê，　　是生伊ê所特別疼；　　chiah-ê cha-bó͘-gín-ná看見，就o-ló伊有福氣；　　王后嬪妃看見，也o-ló伊。Góa ê kap, góa ê sûn-choân-ê, sī to̍k-it ê; I sī i ê lāu-bú to̍k-siⁿ ê, Sī siⁿ--i-ê só͘ te̍k-pia̍t thiàⁿ; Chiah ê cha-bó͘-gín-ná khòaⁿ-kìⁿ, chiū o-ló i ū hok-khì; Ông-hō͘ pīn-hui khòaⁿ-kìⁿ, iā o-ló i.

10Hit-ê ǹg外面看出來，親像早起時ê光，　　Súi親像月，清潔親像日，　　威儀親像kia̍h大旗ê軍隊ê，　　是是誰 ah？Hit-ê ǹg gōa-bīn khòaⁿ--chhut-lâi, chhin-chhiūⁿ chá-khí-sî ê kng, Súi chhin-chhiūⁿ ge̍h, chheng-kiat chhin-chhiūⁿ ji̍t, Ui-gî chhin-chhiūⁿ kia̍h tōa-kî ê kun-tūi ê, Sī chī-chūi ah?

11我落去硬殼ê果子園，　　Beh看山谷中青翠ê植物，　　Beh看葡萄發íⁿ á-bē，　　石榴開花á-bē。Góa lo̍h-khì ngī-khak ê ké-chí-hn̂g, Beh khòaⁿ soaⁿ-kok-tiong chhiⁿ-chhùi ê si̍t-bu̍t, Beh khòaⁿ phû-tô hoat-íⁿ á-bē, Sia̍h-liû khui-hoe á-bē.

12無phah算ê時，我ê心安置我，　　Tī尊貴ê人ê車。Bô phah-sǹg ê sî, góa ê sim an-tì góa, Tī chun-kùi ê lâng ê chhia.

13倒來ah，倒來ah，Su-la̍h-bi̍t ah，　　倒來，倒來，hō͘阮看見你。　　Lín為何beh看Su-la̍h-bi̍t，　　親像看Má-hap-liām ê跳舞ah？Tò-lâi ah, tò-lâi ah, Su-la̍h-bi̍t ah, Tò-lâi, tò-lâi, hō͘ goán khòaⁿ-kìⁿ lí. Lín ūi-hô beh khòaⁿ Su-la̍h-bi̍t, Chhin-chhiūⁿ khòaⁿ Má-hap-liām ê thiàu-bú ah?