1我tī上帝ê面前kap beh審判活人死人ê基督耶穌ê面前，為tio̍h伊ê顯現kap伊ê koh來，Góa tī Siōng-tè ê bīn-chêng kap beh sím-phòaⁿ oa̍h-lâng sí-lâng ê Ki-tok Iâ-so͘ ê bīn-chêng, ūi-tio̍h I ê hián-hiān kap I ê koh-lâi,

2吩咐你tio̍h傳道理，無論得時不得時，tio̍h專務伊，用百般ê寬容教示來責備、警戒、勸勉。hoan-hù lí tio̍h thoân tō-lí, bô lūn tek-sî put-tek-sî, tio̍h choan-bū i, ēng pah-poaⁿ ê khoan-iông kà-sī lâi chek-pī, kéng-kài, khoàn-bián.

3因為時日beh到，人beh m̄容允端正ê教示，beh耳孔chiūⁿ，ài聽chōe-chōe先生，照家己ê私慾；In-ūi sî-ji̍t beh kàu lâng beh m̄ iông-ún toan-chiàⁿ ê kà-sī, beh hī-khang chiūⁿ, ài thiaⁿ chōe-chōe sian-siⁿ, chiàu ka-kī ê su-io̍k;

4koh oa̍t頭m̄聽真理，去ǹg無影ê話。koh oa̍t thâu m̄ thiaⁿ chin-lí, khì ǹg bô iáⁿ ê ōe.

5獨獨你凡事tio̍h節制，忍受艱苦，行傳福音ê ê工，來盡你ê職份。To̍k-to̍k lí hoān sū tio̍h chiat-chè, jím-siū kan-khó͘, kiâⁿ thoân hok-im ê ê kang, lâi chīn lí ê chit-hūn.

6因為taⁿ我ê血teh做灌奠，我過世ê期到lah。In-ūi taⁿ góa ê huih teh chòe koàn-tiān, góa kè-sì ê kî kàu lah.

7我已經爭戰好ê爭戰，已經盡跑走ê路站，已經守所信ê道理。Góa í-keng cheng-chiàn hó ê cheng-chiàn, í-keng chīn pháu-cháu ê lō͘-chām, í-keng siú só͘ sìn ê tō-lí.

8Taⁿ了後有義ê冕旒kā我備辦hē-teh，就是主做公義ê審判司tī hit日beh hō͘我；m̄-nā hō͘我，也beh hō͘見若欣慕伊顯現ê人。Taⁿ liáu-āu ū gī ê bián-liû kā góa pī-pān hē-teh, chiū-sī Chú chòe kong-gī ê sím-phòaⁿ-si tī hit ji̍t beh hō͘ góa; m̄ nā hō͘ góa, iā beh hō͘ kìⁿ-nā him-bō͘ I hián-hiān ê lâng.

9你tio̍h致意緊緊來chhē我。Lí tio̍h tì-ì kín-kín lâi chhē góa.

10因為Tí-má欣慕chit-ê世間，就離開我，去帖撒羅尼迦；Kek-le̍k-sū去加拉太，提多去That-má-thài。In-ūi Tí-má him-bō͘ chit ê sè-kan, chiū lī-khui góa, khì Thiap-sat-lô-nî-ka; Kek-le̍k-sū khì Ka-lia̍p-thài, Thê-to khì That-má-thài.

11只有路加kap我tī-teh。Tio̍h chhōa馬可kap你saⁿ-kap來，因為伊tī服事ê工有利益我。Chí-ū Lō͘-ka kap góa tī-teh. Tio̍h chhōa Má-khó kap lí saⁿ-kap lâi, in-ūi i tī ho̍k-sāi ê kang ū lī-ek góa.

12Chhui-ki-kó͘我已經差伊去以弗所。Chhui-ki-kó͘ góa í-keng chhe i khì Í-hut-só͘.

13我tī Te̍k-lô-a留tī Ka-pò͘ in tau ê外衫，你來ê時tio̍h續帶來，亦tio̍h帶hiah-ê冊，hiah-ê羊皮ê koh-khah要緊。Góa tī Te̍k-lô-a lâu tī Ka-pò͘ in tau ê gōa-saⁿ, lí lâi ê sî tio̍h sòa tòa lâi, ia̍h tio̍h tòa hiah ê chheh, hiah ê iûⁿ-phê ê koh khah iàu-kín.

14Phah銅師傅亞力山大chōe-chōe項害我，主beh照伊ê所行來報應伊。Phah-tâng sai-hū A-le̍k-san-tāi chōe-chōe hāng hāi góa, Chú beh chiàu i ê só͘ kiâⁿ lâi pò-èng i.

15你也tio̍h tiuⁿ-tî伊，因為伊不止對敵阮ê話。Lí iā tio̍h tiuⁿ-tî i, in-ūi i put-chí tùi-te̍k goán ê ōe.

16我頭一pái分訴ê時，無人óa近我，眾人lóng離開我；願chit-ê罪無歸tī in。Góa thâu chi̍t pái hun-sò͘ ê sî bô lâng óa-kūn góa, chèng lâng lóng lī-khui góa; goān chit ê chōe bô kui tī in.

17但是主khiā tī我身邊，hō͘我勇健，hō͘所tio̍h宣傳ê tùi我來一盡報揚，koh hō͘外邦lóng聽見；我也得tio̍h救出tī獅ê嘴。Nā-sī Chú khiā tī góa sin-piⁿ, hō͘ góa ióng-kiāⁿ, hō͘ só͘ tio̍h soan-thoân ê tùi góa lâi it-chīn pò-iông, koh hō͘ gōa-pang lóng thiaⁿ-kìⁿ; góa iā tit-tio̍h kiù chhut tī sai ê chhùi.

18主beh救我脫離lóng總ê pháiⁿ-tāi，也beh救我入tī伊天裡ê國；願榮光歸伊到代代無盡。À-bēng。Chú beh kiù góa thoat-lī lóng-chóng ê pháiⁿ-tāi, iā beh kiù góa ji̍p tī I thiⁿ-ni̍h ê kok; goān êng-kng kui I kàu tāi-tāi bô chīn. À-bēng.

19請安百基拉、亞居拉，kap O-nî-sek-hut ê家。Chhéng-an Pek-ki-lah A-ku-lah, kap O-nî-sek-hut ê ke.

20Í-lah-to͘ tiàm-tī哥林多；Tek-lô-hui-mô͘破病，我留伊tī Bí-lī-to͘。Í-lah-to͘ tiàm-tī Ko-lîm-to; Tek-lô-hui-mô͘ phòa-pīⁿ, góa lâu i tī Bí-lī-to͘.

21Tio̍h致意tī冬天前來。Iú-pò͘-lô、Po͘-tiân、Lī-lô͘、Kek-ló-tia，kap眾兄弟lóng請安你。Tio̍h tì-ì tī tang-thiⁿ chêng lâi. Iú-pò͘-lô, Po͘-tiân, Lī-lô͘, Kek-ló-tia, kap chèng hiaⁿ-tī lóng chhéng-an lí.

22願主kap你ê神tī-teh；願恩典kap lín tī-teh。Goān Chú kap lí ê sîn tī-teh; goān un-tián kap lín tī-teh.

1上帝ê奴僕，耶穌基督ê使徒保羅，為tio̍h上帝揀選ê百姓ê信，kap beh hō͘ in bat敬虔ê真理，Siōng-tè ê lô͘-po̍k, Iâ-so͘ Ki-tok ê sù-tô͘ Pó-lô, ūi-tio̍h Siōng-tè kéng-soán ê peh-sìⁿ ê sìn, kap beh hō͘ in bat kèng-khiân ê chin-lí,

2tī永遠活ê ǹg望，就是無白賊ê上帝tī永世代ê事先所應允ê；tī éng-oán oa̍h ê ǹg-bāng, chiū-sī bô pe̍h-chha̍t ê Siōng-tè tī éng sè-tāi ê tāi-seng só͘ èng-ún ê;

3但是到期就顯明伊ê道理，就是照咱ê救主上帝ê命令所交託我傳ê；nā-sī kàu kî chiū hián-bêng I ê tō-lí, chiū-sī chiàu lán ê Kiù-chú Siōng-tè ê bēng-lēng só͘ kau-thok góa thoân ê;

4phoe寄hō͘提多，就是照saⁿ-kap有ê信做我真ê kiáⁿ ê：願你tùi父上帝kap咱ê救主基督耶穌得tio̍h恩典平安。phoe kià hō͘ Thê-to, chiū-sī chiàu saⁿ-kap ū ê sìn chòe góa chin ê kiáⁿ ê: goān lí tùi Pē Siōng-tè kap lán ê Kiù-chú Ki-tok Iâ-so͘ tit-tio̍h un-tián pêng-an.

5我留你tī Kek-lí-tí ê緣故，就是ài你將hiah-ê辦未明白ê事lóng辦到整齊，koh照我所吩咐你ê，tī ta̍k-ê城設立長老；Góa lâu lí tī Kek-lí-tí ê iân-kò͘, chiū-sī ài lí chiong hiah ê pān bē bêng-pe̍k ê sū lóng pān kàu chéng-chôe, koh chiàu góa só͘ hoan-hù lí ê, tī ta̍k ê siâⁿ siat-li̍p tiúⁿ-ló;

6若有人無thang嫌，做一個婦人人ê丈夫，kiáⁿ兒有信，無人告in放蕩不法ê，chiah thang。nā ū lâng bô thang hiâm, chòe chi̍t ê hū-jîn-lâng ê tiōng-hu, kiáⁿ-jî ū sìn, bô lâng kò in hòng-tōng put-hoat ê, chiah thang.

7因為監督tio̍h無thang嫌，親像上帝ê管家，無自是，無快受氣，無因為食酒來起事，無ài phah人，無貪不義ê錢；In-ūi kàm-tok tio̍h bô thang hiâm, chhin-chhiūⁿ Siōng-tè ê koán-ke, bô chū-sī, bô khoài siū-khì, bô in-ūi chia̍h chiú lâi khí sū, bô ài phah lâng, bô tham put-gī ê chîⁿ;

8tio̍h好款待出外人，ài好、守己、公義、聖潔、節制；tio̍h hó khoán-thāi chhut-gōa lâng, ài hó, siú-kí, kong-gī, sèng-kiat, chiat-chè;

9堅固守hit-ê照正教真實ê道理，hō͘伊會用端正ê教示來勸勉人，koh能辯倒hiah-ê駁問ê人。kian-kò͘ siú hit ê chiàu chèng-kàu chin-si̍t ê tō-lí, hō͘ i ōe ēng toan-chiàⁿ ê kà-sī lâi khoàn-bián lâng, koh ōe piān-tó hiah ê pok-mn̄g ê lâng.

10因為有chōe-chōe m̄順服ê人，就是講浮漂ê話，欺騙人ê；屬割禮ê人koh-khah是án-ni。In-ūi ū chōe-chōe m̄ sūn-ho̍k ê lâng, chiū-sī kóng phû-phiò ê ōe, khi-phiàn lâng ê; sio̍k kat-lé ê lâng koh khah sī án-ni.

11chit號人ê嘴tio̍h kā伊塞密；in為tio̍h不義ê財利， 教示所m̄應該教示ê，來敗壞人ê全家。Chit hō lâng ê chhùi tio̍h kā i that-ba̍t; in ūi-tio̍h put-gī ê châi-lī kà-sī só͘ m̄ eng-kai kà-sī ê, lâi pāi-hoāi lâng ê choân ke.

12In中間一人，就是in hit族ê先知，有講，Kek-lí-tí人常常講白賊，做pháiⁿ獸，貪食，koh pîn-tōaⁿ。In tiong-kan chi̍t lâng, chiū-sī in hit cho̍k ê sian-ti, ū kóng, Kek-lí-tí lâng siông-siông kóng pe̍h-chha̍t, chòe pháiⁿ siù, tham-chia̍h, koh pîn-tōaⁿ.

13Chit-ê干證是真實；所以你tio̍h嚴嚴責備in，hō͘ in tùi信會純全；Chit ê kan-chèng sī chin-si̍t; só͘-í lí tio̍h giâm-giâm chek-pī in, hō͘ in tùi sìn ōe sûn-choân;

14無ài聽猶太人ê無影話，kap悖謬真理ê人ê誡命。bô ài thiaⁿ Iû-thài lâng ê bô-iáⁿ ōe, kap pōe-biū chin-lí ê lâng ê kài-bēng.

15在清氣ê人，萬物lóng是清氣；在hiah-ê污穢無信ê人，無一項物清氣，連in ê心志kap良心也lóng污穢。Chāi chheng-khì ê lâng, bān mi̍h lóng sī chheng-khì; chāi hiah ê ù-òe bô sìn ê lâng, bô chi̍t hāng mi̍h chheng-khì, liân in ê sim-chì kap liông-sim iā lóng ù-òe.

16In家己承認做bat上帝ê，但是tī in ê所行就m̄認伊；in是可惡ê，悖逆ê，tī一切ê好事做不重用ê。In ka-kī sêng-jīn chòe bat Siōng-tè ê, nā-sī tī in ê só͘ kiâⁿ chiū m̄ jīn I; in sī khó-ò͘ⁿ ê, pōe-ge̍k ê, tī it-chhè ê hó sū chòe put-tiòng-iōng ê.

1Hiah-ê合tī端正ê教示ê，你tio̍h講伊，Hiah ê ha̍p tī toan-chiàⁿ ê kà-sī ê, lí tio̍h kóng i,

2就是老人m̄-thang ài食酒，tio̍h端莊、守己，koh tī信，tī仁愛，tī吞忍，無m̄純全。chiū-sī lāu lâng m̄ thang ài chia̍h chiú, tio̍h toan-chong, siú-kí, koh tī sìn, tī jîn-ài, tī thun-lún, bô m̄ sûn-choân.

3老婦人人也tio̍h án-ni，行動舉止tio̍h合tī敬虔，莫得譭謗，也莫得做酒ê奴才，tio̍h用好教示人；Lāu hū-jîn-lâng iā tio̍h án-ni, hêng-tōng kú-chí tio̍h ha̍p tī kèng-khiân, bo̍h-tit húi-pòng, iā bo̍h-tit chòe chiú ê lô͘-châi, tio̍h ēng hó kà-sī lâng;

4chiah thang教督少年ê婦人人疼in ê丈夫，疼in ê kiáⁿ兒，chiah thang kàu-tok siàu-liân ê hū-jîn-lâng thiàⁿ in ê tiōng-hu, thiàⁿ in ê kiáⁿ-jî,

5守己，貞潔、料理家事、善良，順服家己ê丈夫，免得上帝ê道理受tio̍h謗瀆。siú-kí, cheng-kiat, liāu-lí ke sū, siān-liông, sūn-ho̍k ka-kī ê tiōng-hu, bián-tit Siōng-tè ê tō-lí siū-tio̍h pòng-to̍k.

6少年ê ta-po͘人，你也tio̍h án-ni勸in守己。Siàu-liân ê ta-po͘-lâng, lí iā tio̍h án-ni khǹg in siú-kí.

7你凡事tio̍h家己做好所行ê模樣；Lí hoān sū tio̍h ka-kī chòe hó só͘ kiâⁿ ê bô͘-iūⁿ;

8tī教示tio̍h端莊無邪，言語端正，無thang嫌，hō͘對敵家己見笑，無teh thang講咱ê pháiⁿ。tī kà-sī tio̍h toan-chong bô siâ, giân-gú toan-chiàⁿ, bô thang hiâm, hō͘ tùi-te̍k ka-kī kiàn-siàu, bô teh thang kóng lán ê pháiⁿ.

9勸奴僕tio̍h順服in ê主人，凡事hō͘ in歡喜，無抵觸，Khǹg lô͘-po̍k tio̍h sūn-ho̍k in ê chú-lâng, hoān sū hō͘ in hoaⁿ-hí, bô tú-tak,

10無偷the̍h，ta̍k項tio̍h顯明忠信，hō͘ in凡事榮光咱ê救主上帝ê教。bô thau-the̍h, ta̍k hāng tio̍h hián-bêng tiong-sìn, hō͘ in hoān sū êng-kng lán ê Kiù-chú Siōng-tè ê kàu.

11因為上帝救眾人ê恩已經顯明，In-ūi Siōng-tè kiù chèng lâng ê un í-keng hián-bêng,

12警戒咱tio̍h棄sak不虔kap chit世間ê私慾，用守己、公義、敬虔來過日tī chit世代；kéng-kài lán tio̍h khì-sak put-khiân kap chit sè-kan ê su-io̍k, ēng siú-kí, kong-gī, kèng-khiân lâi kè-ji̍t tī chit sè-tāi;

13欣慕hit-ê大福氣ê ǹg望，kap咱至大ê上帝kap救主耶穌基督榮光ê顯現。him-bō͘ hit ê tōa hok-khì ê ǹg-bāng, kap lán chì tōa ê Siōng-tè kap Kiù-chú Iâ-so͘ Ki-tok êng-kng ê hián-hiān.

14伊為tio̍h咱獻家己，beh贖咱脫離一切ê不法；koh為tio̍h本身洗清咱做伊家己ê百姓，就是熱心tī chiah-ê好所行ê。I ūi-tio̍h lán hiàn ka-kī, beh sio̍k lán thoat-lī it-chhè ê put-hoat; koh ūi-tio̍h pún-sin sóe-chheng lán chòe I ka-kī ê peh-sìⁿ, chiū-sī jia̍t-sim tī chiah ê hó só͘ kiâⁿ ê.

15Chiah-ê事你tio̍h講，tio̍h苦勸，用lóng總ê權來責備人。M̄-thang hō͘人藐視你。Chiah ê sū lí tio̍h kóng, tio̍h khó͘-khǹg, ēng lóng-chóng ê koân lâi chek-pī lâng. M̄ thang hō͘ lâng biáu-sī lí.