1當春天ê雨ê時，lín tio̍h對耶和華求雨，就是發出sih-nà ê耶和華；伊beh kā in落chōe-chōe chūn ê雨，hō͘ ta̍k人有田園ê菜蔬。Tng chhun-thiⁿ ê hō͘ ê sî lín tio̍h tùi Iâ-hô-hoa kiû hō͘, chiū-sī hoat-chhut sih-nà ê Iâ-hô-hoa; I beh kā in lo̍h chōe-chōe chūn ê hō͘, hō͘ ta̍k-lâng ū chhân-hn̂g ê chhài-soe.

2因為家內ê偶像講白賊，占卜ê看虛假，講無影跡ê夢，空空安慰人；所以in迷路親像羊；koh因為無牧者，致到受困苦。In-ūi ke-lāi ê ngó͘-siōng kóng pe̍h-chha̍t, chiam-pok-ê khòaⁿ hu-ké, kóng bô-iáⁿ-chiah ê bāng, khang-khang an-ùi lâng; só͘-í in bê-lō͘ chhin-chhiūⁿ iûⁿ; koh in-ūi bô bo̍k-chiá, tì-kàu siū khùn-khó͘.

3我ê受氣對hiah-ê牧者發作，我也beh辨理hiah-ê工ê山羊；因為萬軍ê耶和華看顧祂ê羊群，就是猶大家，hō͘ in親像祂ê好馬tī戰陣。Góa ê siū-khì tùi hiah ê bo̍k-chiá hoat-choh, Góa iā beh pān-lí hiah ê kang ê soaⁿ-iûⁿ; in-ūi bān-kun ê Iâ-hô-hoa khòaⁿ-kò͘ I ê iûⁿ-kûn, chiū-sī Iû-tāi ke, hō͘ in chhin-chhiūⁿ I ê hó-bé tī chiàn-tīn.

4厝角石tùi祂出，堅固ê釘也tùi祂出，交戰ê弓也tùi祂出，chiah-ê掌權ê也tùi祂出。Chhù-kak-chio̍h tùi I chhut, kian-kò͘ ê teng iā tùi I chhut, kau-chiàn ê keng iā tùi I chhut, chiah ê chiáng-koân-ê iā tùi I chhut.

5In beh親像勇士，tī戰陣踏對敵tī街路ê土糜中；in beh交戰，因為耶和華kap in tī-teh；見若騎馬ê無m̄見笑。In beh chhin-chhiūⁿ ióng-sū, tī chiàn-tīn ta̍h tùi-te̍k tī ke-lō͘ ê thô͘-bê-tiong; in beh kau-chiàn, in-ūi Iâ-hô-hoa kap in tī-teh; kìⁿ-nā khiâ-bé-ê bô m̄ kiàn-siàu.

6我beh堅固猶大家，拯救約瑟ê家；beh chhōa in tò來，因為我憐憫in；in beh親像我bē-bat棄sak in ê款；因為我是耶和華in ê上帝，我beh疼in。Góa beh kian-kò͘ Iû-tāi ke, chín-kiù Iok-sek ê ke; beh chhōa in tò--lâi, in-ūi Góa lîn-bín in; in beh chhin-chhiūⁿ Góa bē-bat khì-sak in ê khoán; in-ūi Góa sī Iâ-hô-hoa in ê Siōng-tè, Góa beh thiàⁿ in.

7Í-hoat-liân beh親像勇士；in ê心歡喜，親像lim酒；in ê kiáⁿ兒beh看見來歡喜；in ê心beh因為耶和華快樂。Í-hoat-liân beh chhin-chhiūⁿ ióng-sū; in ê sim hoaⁿ-hí, chhin-chhiūⁿ lim-chiú; in ê kiáⁿ-jî beh khòaⁿ-kìⁿ lâi hoaⁿ-hí; in ê sim beh in-ūi Iâ-hô-hoa khoài-lo̍k.

8我beh出口號，來聚集in；因為我已經救贖in，in beh加添親像in前ê加添。Góa beh chhut kháu-hō, lâi chū-chi̍p in; in-ūi Góa í-keng kiù-sio̍k in, in beh ke-thiⁿ chhin-chhiūⁿ in chêng ê ke-thiⁿ.

9我雖然四散in tī列國中，in beh tī遠ê所在記念我；in kap in ê kiáⁿ兒lóng beh活teh，koh tò來。Góa sui-jiân sì-sòaⁿ in tī lia̍t-kok-tiong, in beh tī hn̄g ê só͘-chāi kì-liām Góa; in kap in ê kiáⁿ-jî lóng beh oa̍h--teh, koh tò--lâi.

10我beh koh hō͘ in tùi埃及tò來，聚集in出亞述；chhōa in到Ki-lia̍t地kap黎巴嫩；也無夠額所在thang hō͘ in khiā起。Góa beh koh hō͘ in tùi Ai-ki̍p tò--lâi, chū-chi̍p in chhut A-su̍t; chhōa in kàu Ki-lia̍t tōe kap Lī-pa-lùn; iā bô kàu-gia̍h só͘-chāi thang hō͘ in khiā-khí.

11伊beh經過苦難ê海，攻擊海中ê波浪；尼羅河深ê所在beh lóng乾去；亞述ê驕傲beh降低，埃及ê權柄beh無去。I beh keng-kè khó͘-lān ê hái, kong-kek hái-tiong ê pho-lōng; Nî-lô hô chhim ê só͘-chāi beh lóng ta--khì; A-su̍t ê kiau-ngō͘ beh kàng-kē, Ai-ki̍p ê koân-pèng beh bô--khì.

12我beh hō͘ in tī耶和華勇壯；koh託伊ê名行來行去；這是耶和華講ê。Góa beh hō͘ in tī Iâ-hô-hoa ióng-chòng; koh thok I ê miâ kiâⁿ-lâi kiâⁿ-khì; che sī Iâ-hô-hoa kóng--ê.

1黎巴嫩ah，你Tio̍h開你ê門，hō͘火thang燒滅你ê柏香樹。Lī-pa-lùn ah, lí tio̍h khui lí ê mn̂g, hō͘ hé thang sio-bia̍t lí ê pek-hiuⁿ-chhiū.

2松樹ah，lín tio̍h哮，因為柏香樹已經倒，súi ê樹已經毀壞；Pa-san ê橡樹ah，lín tio̍h哮，因為茂盛ê樹林已經衰敗。Siông-chhiū ah, lín tio̍h háu, in-ūi pek-hiuⁿ-chhiū í-keng tó, súi ê chhiū í-keng húi-hoāi; Pa-san ê siōng-chhiū ah, lín tio̍h háu, in-ūi bō͘-sēng ê chhiū-nâ í-keng soe-pāi.

3聽ah，有牧者teh哮，因為in ê榮耀毀壞lah；聽ah，有勇ê獅hm̄-hm̄哮，因為約旦河邊ê樹林荒廢lah。Thiaⁿ ah, ū bo̍k-chiá teh háu, in-ūi in ê êng-iāu húi-hoāi lah; thiaⁿ ah, ū ióng ê sai hm̄-hm̄-háu, in-ūi Iok-tàn hô-piⁿ ê chhiū-nâ hong-hòe lah.

4耶和華，我ê上帝，án-ni講：Iâ-hô-hoa, góa ê Siōng-tè, án-ni kóng:

5Beh thâi ê羊群你tio̍h飼；買in-ê thâi in，家己掠做無罪；賣in-ê講，耶和華是應該o-ló-ê，因為我好額lah；in ê牧者也無憐憫in。Beh thâi ê iûⁿ-kûn lí tio̍h chhī; bóe in ê thâi in, ka-kī lia̍h-chòe bô chōe; bōe in ê kóng, Iâ-hô-hoa sī eng-kai o-ló--ê, in-ūi góa hó-gia̍h lah; in ê bo̍k-chiá iā bô lîn-bín in.

6耶和華講，我無koh憐憫chit所在khiā起ê百姓；看ah，我beh將in ta̍k人交tī in厝邊ê手，也tī伊ê王ê手；in beh phah chit-ê地方；我也無beh救百姓脫離in ê手。Iâ-hô-hoa kóng, Góa bô koh lîn-bín chit só͘-chāi khiā-khí ê peh-sìⁿ; khòaⁿ ah, Góa beh chiong in ta̍k-lâng kau tī in chhù-piⁿ ê chhiú, iā tī i ê ông ê chhiú; in beh phah chit ê tōe-hng; Góa iā bô beh kiù peh-sìⁿ thoat-lī in ê chhiú.

7Tùi án-ni，我飼beh thâi ê羊群，就是羊群中第一困苦ê。我家己取兩支柺á，一支叫做恩惠，一支叫做連絡，來飼chit-ê羊群。Tùi án-ni góa chhī beh thâi ê iûⁿ-kûn, chiū-sī iûⁿ-kûn-tiong tē-it khùn-khó͘--ê. Góa ka-kī chhú nn̄g ki koáiⁿ-á, chi̍t-ki kiò-chòe Un-hūi, chi̍t-ki kiò-chòe Liân-lo̍k, lâi chhī chit ê iûⁿ-kûn.

8一月日內，我除去三個牧者，因為我ê心厭賤in，in ê心也棄嫌我。Chi̍t-ge̍h-ji̍t-lāi, Góa tû--khì saⁿ ê bo̍k-chiá, in-ūi Góa ê sim iàm-chiān in, in ê sim iā khì-hiâm Góa.

9我就講，我無beh養飼lín，死ê chhut-chāi伊死；無去ê，chhut-chāi伊無去；所chhun-ê，chhut-chāi in相吞食。Góa chiū kóng, Góa bô beh iúⁿ-chhī lín, sí--ê chhut-chāi i sí; bô--khì-ê, chhut-chāi i bô--khì; só͘-chhun--ê, chhut-chāi in saⁿ-thun-chia̍h.

10我kia̍h我hit支恩惠ê柺á at折伊，來廢無我kap萬百姓所立ê約；Góa kia̍h Góa hit-ki Un-hūi ê koáiⁿ-á at-chi̍h i, lâi hòe-bô Góa kap bān peh-sìⁿ só͘ li̍p ê iok;

11Hit日就廢無伊；困苦ê羊ǹg望我ê，lóng知這是耶和華ê話。hit-ji̍t chiū hòe-bô i; khùn-khó͘ ê iûⁿ ǹg-bāng Góa--ê, lóng chai che sī Iâ-hô-hoa ê ōe.

12我對in講，Lín若掠做好，就hō͘我工錢，若無，就soah；Tùi án-ni， in秤(phêng)銀三十做我ê工錢。Góa tùi in kóng, Lín nā lia̍h-chòe hó, chiū hō͘ góa kang-chîⁿ, nā bô, chiū soah; tùi án-ni in phêng gûn saⁿ-cha̍p chòe góa ê kang-chîⁿ.

13耶和華kā我講，Tio̍h將hit-ê hiat hō͘燒磁人，就是in所估我高ê價錢；我就the̍h hit-ê銀三十，hiat hō͘燒磁人，tī耶和華ê殿。Iâ-hô-hoa kā góa kóng, Tio̍h chiong hit-ê hiat hō͘ sio-hûi-lâng, chiū-sī in só͘ kó͘ góa koâiⁿ ê kè-chîⁿ; góa chiū the̍h hit ê gûn saⁿ-cha̍p, hiat hō͘ sio-hûi-lâng, tī Iâ-hô-hoa ê tiān.

14我koh at折我第二支ê柺á，名做連絡ê，來廢無猶大kap以色列兄弟ê情義。Góa koh at-chi̍h Góa tē-jī-ki ê koáiⁿ-á, miâ chòe Liân-lo̍k--ê, lâi hòe-bô Iû-tāi kap Í-sek-lia̍t hiaⁿ-tī ê chêng-gī.

15耶和華koh kā我講，你koh the̍h戇ê牧者所用hiah-ê器具。Iâ-hô-hoa koh kā góa kóng, Lí koh the̍h gōng ê bo̍k-chiá só͘ ēng hiah ê khì-kū.

16看ah，我beh tī chit所在興起一個牧者，失落ê，伊無beh chhap；四散ê，伊無beh chhē；受傷ê，伊無beh醫伊；勇壯ê，伊無beh飼伊；kan-ta beh食肥ê ê肉，拆裂伊ê蹄。Khòaⁿ ah, Góa beh tī chit só͘-chāi heng-khí chi̍t ê bo̍k-chiá, sit-lo̍h--ê, i bô beh chhap; sì-sòaⁿ--ê, i bô beh chhē; siū-siong--ê, i bô beh i--i; ióng-chòng--ê, i bô beh chhī--i; kan-ta beh chia̍h pûi--ê ê bah, thiah-li̍h i ê tôe.

17無路用ê牧者，棄sak羊群ê，有災厄ah，刀beh臨到伊ê手，kap伊ê chiàⁿ目；伊ê手beh全然枯焦，伊ê chiàⁿ目beh烏烏暗暗。Bô lō͘-ēng ê bo̍k-chiá, khì-sak iûⁿ-kûn--ê, ū chai-ē ah, to beh lîm-kàu i ê chhiú, kap i ê chiàⁿ-ba̍k; i ê chhiú beh choân-jiân ko͘-tâ, i ê chiàⁿ-ba̍k beh o͘-o͘ àm-àm.

1耶和華論以色列默示ê話。耶和華thí開chiah-ê天，建立地ê根基，創造人ê心神ê；Iâ-hô-hoa lūn Í-sek-lia̍t be̍k-sī ê ōe. Iâ-hô-hoa thí-khui chiah ê thiⁿ, kiàn-li̍p tōe ê kun-ki, chhòng-chō lâng ê sim-sîn--ê;

2祂ê話講，看ah，我beh hō͘耶路撒冷做四圍chiah-ê百姓致到醉ê杯，耶路撒冷受圍困ê時，猶大也beh án-ni。I ê ōe kóng, Khòaⁿ ah, Góa beh hō͘ Iâ-lō͘-sat-léng chòe sì-ûi chiah ê peh-sìⁿ tì-kàu chùi ê poe, Iâ-lō͘-sat-léng siū ûi-khùn ê sî, Iû-tāi iā beh án-ni.

3Hit日我beh hō͘耶路撒冷對tī萬百姓成做重ê石，見若giâ伊ê，beh受重傷；地上列邦beh聚集來攻擊伊。Hit-ji̍t Góa beh hō͘ Iâ-lō͘-sat-léng tùi tī bān peh-sìⁿ chiâⁿ-chòe tāng ê chio̍h, kìⁿ-nā giâ i--ê, beh siū tāng-siong; tōe-chiūⁿ lia̍t-pang beh chū-chi̍p lâi kong-kek i.

4耶和華講，到hit日，我beh hō͘ lóng總ê馬驚惶，hō͘騎馬ê人癲顛狂；我beh看顧猶大家，phah列國一切ê馬，hō͘伊chhiⁿ-mî。Iâ-hô-hoa kóng, Kàu hit-ji̍t, Góa beh hō͘ lóng-chóng ê bé kiaⁿ-hiâⁿ, hō͘ khiâ-bé ê lâng tian-kông; Góa beh khòaⁿ-kò͘ Iû-tāi ke, phah lia̍t-kok it-chhè ê bé, hō͘ i chhiⁿ-mî.

5猶大ê族長，心內beh講，耶路撒冷khiā起ê百姓做我ê力；因為in óa靠in ê上帝萬軍ê耶和華。Iû-tāi ê cho̍k-tiúⁿ, sim-lāi beh kóng, Iâ-lō͘-sat-léng khiā-khí ê peh-sìⁿ chòe góa ê la̍t; in-ūi in óa-khò in ê Siōng-tè bān-kun ê Iâ-hô-hoa.

6Hit日我beh hō͘猶大ê族長，親像火鼎tī柴ê中間，koh親像火把tī稻綑ê中間；in beh tī tò-pêng chiàⁿ-pêng燒滅四圍ê列國；耶路撒冷beh猶原tiàm-tī本所在，就是耶路撒冷。Hit-ji̍t Góa beh hō͘ Iû-tāi ê cho̍k-tiúⁿ, chhin-chhiūⁿ hé-tiáⁿ tī chhâ ê tiong-kan, koh chhin-chhiūⁿ hé-pé tī tiū-khún ê tiong-kan; in beh tī tò-pêng chiàⁿ-pêng sio-bia̍t sì-ûi ê lia̍t-kok; Iâ-lō͘-sat-léng beh iû-goân tiàm-tī pún só͘-chāi, chiū-sī Iâ-lō͘-sat-léng.

7耶和華beh事先拯救猶大ê布棚，hō͘大衛ê家ê榮光kap耶路撒冷khiā起ê百姓ê榮光，bōe能贏過猶大。Iâ-hô-hoa beh tāi-seng chín-kiù Iû-tāi ê pò͘-pîⁿ, hō͘ Tāi-pi̍t ê ke ê êng-kng kap Iâ-lō͘-sat-léng khiā-khí ê peh-sìⁿ ê êng-kng, bōe-ōe iâⁿ-kè Iû-tāi.

8Hit日耶和華beh保護耶路撒冷khiā起ê百姓；in中間軟chiáⁿ-ê，tī hit日beh親像大衛；大衛ê家beh親像上帝，親像tī in頭前ê耶和華ê使者。Hit-ji̍t Iâ-hô-hoa beh pó-hō͘ Iâ-lō͘-sat-léng khiā-khí ê peh-sìⁿ; in tiong-kan nńg-chiáⁿ--ê, tī hit-ji̍t beh chhin-chhiūⁿ Tāi-pi̍t; Tāi-pi̍t ê ke beh chhin-chhiūⁿ Siōng-tè, Chhin-chhiūⁿ tī in thâu-chêng ê Iâ-hô-hoa ê sù-chiá.

9Hit日，來攻擊耶路撒冷ê列國，我定tio̍h意思beh滅伊。Hit-ji̍t, lâi kong-kek Iâ-lō͘-sat-léng ê lia̍t-kok, Góa tiāⁿ-tio̍h ì-sù beh bia̍t i.

10我beh用恩惠kap祈禱ê神，piàⁿ落tī大衛ê家，kap耶路撒冷khiā起ê百姓；in beh仰望我，就是in所鑿ê；koh beh為tio̍h伊悲哀，親像人為tio̍h孤身ê kiáⁿ悲哀；koh為tio̍h伊憂苦，親像人為tio̍h大kiáⁿ憂苦一樣。Góa beh ēng un-hūi kap kî-tó ê sîn, piàⁿ-lo̍h tī Tāi-pi̍t ê ke, kap Iâ-lō͘-sat-léng khiā-khí ê peh-sìⁿ; in beh gióng-bōng Góa, chiū-sī in só͘ chha̍k--ê; koh beh ūi-tio̍h i pi-ai, chhin-chhiūⁿ lâng ūi-tio̍h ko͘-siⁿ ê kiáⁿ pi-ai; koh ūi-tio̍h i iu-khó͘, chhin-chhiūⁿ lâng ūi-tio̍h tōa-kiáⁿ iu-khó͘ chi̍t-iūⁿ.

11當hit日，tī耶路撒冷beh有大大悲哀，親像tī Bí-kiat-to平洋ê Hap-ta̍t-lîm-bûn ê悲哀。Tng hit-ji̍t, tī Iâ-lō͘-sat-léng beh ū tōa-tōa pi-ai, chhin-chhiūⁿ tī Bí-kiat-to pîⁿ-iûⁿ ê Hap-ta̍t-lîm-bûn ê pi-ai.

12境內悲哀，ta̍k家另外tiàm；大衛族ê家另外tiàm，in ê婦人人另外tiàm；Ná-tan族ê家另外tiàm，in ê婦人人另外tiàm。Kéng-lāi pi-ai, ta̍k-ke lēng-gōa tiàm; Tāi-pi̍t cho̍k ê ke lēng-gōa tiàm, in ê hū-jîn-lâng lēng-gōa tiàm; Ná-tan cho̍k ê ke lēng-gōa tiàm, in ê hū-jîn-lâng lēng-gōa tiàm.

13利未族ê家另外tiàm，in ê婦人人也另外tiàm；Sī-múi族ê家另外tiàm，in ê婦人人也另外tiàm。Lī-bī cho̍k ê ke lēng-gōa tiàm, in ê hū-jîn-lâng iā lēng-gōa tiàm; Sī-múi cho̍k ê ke lēng-gōa tiàm, in ê hū-jîn-lâng iā lēng-gōa tiàm.

14其餘hiah-ê家ta̍k家另外tiàm，in ê婦人人也另外tiàm。Kî-û hiah ê ke ta̍k-ke lēng-gōa tiàm, in ê hū-jîn-lâng iā lēng-gōa tiàm.