1耶和華論以色列默示ê話。耶和華thí開chiah-ê天，建立地ê根基，創造人ê心神ê；Iâ-hô-hoa lūn Í-sek-lia̍t be̍k-sī ê ōe. Iâ-hô-hoa thí-khui chiah ê thiⁿ, kiàn-li̍p tōe ê kun-ki, chhòng-chō lâng ê sim-sîn--ê;

2祂ê話講，看ah，我beh hō͘耶路撒冷做四圍chiah-ê百姓致到醉ê杯，耶路撒冷受圍困ê時，猶大也beh án-ni。I ê ōe kóng, Khòaⁿ ah, Góa beh hō͘ Iâ-lō͘-sat-léng chòe sì-ûi chiah ê peh-sìⁿ tì-kàu chùi ê poe, Iâ-lō͘-sat-léng siū ûi-khùn ê sî, Iû-tāi iā beh án-ni.

3Hit日我beh hō͘耶路撒冷對tī萬百姓成做重ê石，見若giâ伊ê，beh受重傷；地上列邦beh聚集來攻擊伊。Hit-ji̍t Góa beh hō͘ Iâ-lō͘-sat-léng tùi tī bān peh-sìⁿ chiâⁿ-chòe tāng ê chio̍h, kìⁿ-nā giâ i--ê, beh siū tāng-siong; tōe-chiūⁿ lia̍t-pang beh chū-chi̍p lâi kong-kek i.

4耶和華講，到hit日，我beh hō͘ lóng總ê馬驚惶，hō͘騎馬ê人癲顛狂；我beh看顧猶大家，phah列國一切ê馬，hō͘伊chhiⁿ-mî。Iâ-hô-hoa kóng, Kàu hit-ji̍t, Góa beh hō͘ lóng-chóng ê bé kiaⁿ-hiâⁿ, hō͘ khiâ-bé ê lâng tian-kông; Góa beh khòaⁿ-kò͘ Iû-tāi ke, phah lia̍t-kok it-chhè ê bé, hō͘ i chhiⁿ-mî.

5猶大ê族長，心內beh講，耶路撒冷khiā起ê百姓做我ê力；因為in óa靠in ê上帝萬軍ê耶和華。Iû-tāi ê cho̍k-tiúⁿ, sim-lāi beh kóng, Iâ-lō͘-sat-léng khiā-khí ê peh-sìⁿ chòe góa ê la̍t; in-ūi in óa-khò in ê Siōng-tè bān-kun ê Iâ-hô-hoa.

6Hit日我beh hō͘猶大ê族長，親像火鼎tī柴ê中間，koh親像火把tī稻綑ê中間；in beh tī tò-pêng chiàⁿ-pêng燒滅四圍ê列國；耶路撒冷beh猶原tiàm-tī本所在，就是耶路撒冷。Hit-ji̍t Góa beh hō͘ Iû-tāi ê cho̍k-tiúⁿ, chhin-chhiūⁿ hé-tiáⁿ tī chhâ ê tiong-kan, koh chhin-chhiūⁿ hé-pé tī tiū-khún ê tiong-kan; in beh tī tò-pêng chiàⁿ-pêng sio-bia̍t sì-ûi ê lia̍t-kok; Iâ-lō͘-sat-léng beh iû-goân tiàm-tī pún só͘-chāi, chiū-sī Iâ-lō͘-sat-léng.

7耶和華beh事先拯救猶大ê布棚，hō͘大衛ê家ê榮光kap耶路撒冷khiā起ê百姓ê榮光，bōe能贏過猶大。Iâ-hô-hoa beh tāi-seng chín-kiù Iû-tāi ê pò͘-pîⁿ, hō͘ Tāi-pi̍t ê ke ê êng-kng kap Iâ-lō͘-sat-léng khiā-khí ê peh-sìⁿ ê êng-kng, bōe-ōe iâⁿ-kè Iû-tāi.

8Hit日耶和華beh保護耶路撒冷khiā起ê百姓；in中間軟chiáⁿ-ê，tī hit日beh親像大衛；大衛ê家beh親像上帝，親像tī in頭前ê耶和華ê使者。Hit-ji̍t Iâ-hô-hoa beh pó-hō͘ Iâ-lō͘-sat-léng khiā-khí ê peh-sìⁿ; in tiong-kan nńg-chiáⁿ--ê, tī hit-ji̍t beh chhin-chhiūⁿ Tāi-pi̍t; Tāi-pi̍t ê ke beh chhin-chhiūⁿ Siōng-tè, Chhin-chhiūⁿ tī in thâu-chêng ê Iâ-hô-hoa ê sù-chiá.

9Hit日，來攻擊耶路撒冷ê列國，我定tio̍h意思beh滅伊。Hit-ji̍t, lâi kong-kek Iâ-lō͘-sat-léng ê lia̍t-kok, Góa tiāⁿ-tio̍h ì-sù beh bia̍t i.

10我beh用恩惠kap祈禱ê神，piàⁿ落tī大衛ê家，kap耶路撒冷khiā起ê百姓；in beh仰望我，就是in所鑿ê；koh beh為tio̍h伊悲哀，親像人為tio̍h孤身ê kiáⁿ悲哀；koh為tio̍h伊憂苦，親像人為tio̍h大kiáⁿ憂苦一樣。Góa beh ēng un-hūi kap kî-tó ê sîn, piàⁿ-lo̍h tī Tāi-pi̍t ê ke, kap Iâ-lō͘-sat-léng khiā-khí ê peh-sìⁿ; in beh gióng-bōng Góa, chiū-sī in só͘ chha̍k--ê; koh beh ūi-tio̍h i pi-ai, chhin-chhiūⁿ lâng ūi-tio̍h ko͘-siⁿ ê kiáⁿ pi-ai; koh ūi-tio̍h i iu-khó͘, chhin-chhiūⁿ lâng ūi-tio̍h tōa-kiáⁿ iu-khó͘ chi̍t-iūⁿ.

11當hit日，tī耶路撒冷beh有大大悲哀，親像tī Bí-kiat-to平洋ê Hap-ta̍t-lîm-bûn ê悲哀。Tng hit-ji̍t, tī Iâ-lō͘-sat-léng beh ū tōa-tōa pi-ai, chhin-chhiūⁿ tī Bí-kiat-to pîⁿ-iûⁿ ê Hap-ta̍t-lîm-bûn ê pi-ai.

12境內悲哀，ta̍k家另外tiàm；大衛族ê家另外tiàm，in ê婦人人另外tiàm；Ná-tan族ê家另外tiàm，in ê婦人人另外tiàm。Kéng-lāi pi-ai, ta̍k-ke lēng-gōa tiàm; Tāi-pi̍t cho̍k ê ke lēng-gōa tiàm, in ê hū-jîn-lâng lēng-gōa tiàm; Ná-tan cho̍k ê ke lēng-gōa tiàm, in ê hū-jîn-lâng lēng-gōa tiàm.

13利未族ê家另外tiàm，in ê婦人人也另外tiàm；Sī-múi族ê家另外tiàm，in ê婦人人也另外tiàm。Lī-bī cho̍k ê ke lēng-gōa tiàm, in ê hū-jîn-lâng iā lēng-gōa tiàm; Sī-múi cho̍k ê ke lēng-gōa tiàm, in ê hū-jîn-lâng iā lēng-gōa tiàm.

14其餘hiah-ê家ta̍k家另外tiàm，in ê婦人人也另外tiàm。Kî-û hiah ê ke ta̍k-ke lēng-gōa tiàm, in ê hū-jîn-lâng iā lēng-gōa tiàm.

1當hit日beh為tio̍h大衛ê家kap耶路撒冷khiā起ê百姓開一個水泉，洗除罪惡kap lâ-sâm。Tng hit-ji̍t beh ūi-tio̍h Tāi-pi̍t ê ke kap Iâ-lō͘-sat-léng khiā-khí ê peh-sìⁿ khui chi̍t ê chúi-chôaⁿ, sóe-tû chōe-ok kap lâ-sâm.

2萬軍ê耶和華講，當hit日，我beh tùi chit-ê地方除去偶像ê名，無koh hō͘人記念；也beh hō͘先知kap污穢ê神離開chit所在。Bān-kun ê Iâ-hô-hoa kóng, Tng hit-ji̍t, Góa beh tùi chit ê tōe-hng tû-khì ngó͘-siōng ê miâ, bô koh hō͘ lâng kì-liām; iā beh hō͘ sian-ti kap ù-òe ê sîn lī-khui chit só͘-chāi.

3若有人讖語，生伊ê父母beh kā伊講，你bōe得tio̍h活，因為你託耶和華ê名講白賊；生伊ê父母，tī伊讖語ê時，beh將伊鑿透。Nā ū lâng chhàm-gú, siⁿ i ê pē-bú beh kā i kóng, Lí bōe tit-tio̍h oa̍h, in-ūi lí thok Iâ-hô-hoa ê miâ kóng pe̍h-chha̍t; siⁿ i ê pē-bú, tī i chhàm-gú ê sî, beh chiong i chha̍k-thàu.

4Hit日hiah-ê先知，ta̍k-ê tī in讖語ê時，beh為tio̍h in ê異象來見笑，無koh穿有毛ê衫來騙人；Hit-ji̍t hiah ê sian-ti, ta̍k-ê tī in chhàm-gú ê sî, beh ūi-tio̍h in ê īⁿ-siōng lâi kiàn-siàu, bô koh chhēng ū mn̂g ê saⁿ lâi phiàn lâng;

5伊beh講，我m̄是先知，我是作穡人；我tùi細漢就做人ê奴僕。i beh kóng, Góa m̄-sī sian-ti, góa sī choh-sit lâng; góa tùi sòe-hàn chiū chòe lâng ê lô͘-po̍k.

6有人beh問伊講，你兩手ê中間是甚麼傷ah？伊beh應講，這是我tī朋友ê家中所受ê傷。Ū lâng beh mn̄g i kóng, Lí nn̄g chhiú ê tiong-kan sī sím-mi̍h siong ah? I beh ìn kóng, Che sī góa tī pêng-iú ê ke-tiong só͘ siū ê siong.

7萬軍ê耶和華講，刀劍ah，tio̍h起來攻擊我ê牧者，也攻擊hit-ê kap我做同伴ê人；phah牧者，羊群就四散；hiah-ê微細ê，我beh oa̍t-tńg手到tī in。Bān-kun ê Iâ-hô-hoa kóng, To-kiàm ah, tio̍h khí-lâi kong-kek Góa ê bo̍k-chiá, iā kong-kek hit-ê kap Góa chòe tâng-phōaⁿ ê lâng; phah bo̍k-chiá, iûⁿ-kûn chiū sì-sòaⁿ; hiah-ê bî-sòe--ê, Góa beh oa̍t-tńg chhiú kàu tī in.

8耶和華講，chit-ê全地ê人，兩份beh受剪除來死；一份beh留teh。Iâ-hô-hoa kóng, Chit ê choân-tōe ê lâng, nn̄g-hūn beh siū chián-tû lâi sí; chi̍t-hūn beh lâu--teh.

9我beh hō͘ chit-ê三份一經過火，鍛鍊in親像鍛鍊銀，試煉in親像試煉金；in beh求叫我ê名，我beh應in；我beh講，這是我ê百姓；in也beh講，耶和華是我ê上帝。Góa beh hō͘ chit-ê saⁿ-hūn-chi̍t keng-kè hé, thoàn-liān in chhin-chhiūⁿ thoàn-liān gûn, chhì-liān in chhin-chhiūⁿ chhì-liān kim; in beh kiû-kiò Góa ê miâ, Góa beh ìn in; Góa beh kóng, Che sī Góa ê peh-sìⁿ; in iā beh kóng, Iâ-hô-hoa sī góa ê Siōng-tè.

1看ah，耶和華ê日beh到，你ê貨財beh hō͘人分tī lín中間。Khòaⁿ ah, Iâ-hô-hoa ê ji̍t beh kàu, lí ê hè-châi beh hō͘ lâng pun tī lín tiong-kan.

2因為我beh聚集萬國kap耶路撒冷交戰；城beh受攻破，厝宅beh受搶劫，婦人人beh受凌辱；城內ê百姓一半受人掠去；所chhun ê百姓猶原tī城內，無致到剪除。In-ūi Góa beh chū-chi̍p bān-kok kap Iâ-lō͘-sat-léng kau-chiàn; siâⁿ beh siū kong-phòa, chhù-the̍h beh siū chhiúⁿ-kiap, hū-jîn-lâng beh siū lêng-jio̍k; siâⁿ-lāi ê peh-sìⁿ chi̍t-pòaⁿ siū lâng lia̍h--khì; só͘ chhun ê peh-sìⁿ iû-goân tī siâⁿ-lāi, bô tì-kàu chián-tû.

3Hit時耶和華beh出去kap hiah-ê國交戰，親像從前臨陣ê日交戰一樣。Hit-sî Iâ-hô-hoa beh chhut-khì kap hiah ê kok kau-chiàn, chhin-chhiūⁿ chiông-chêng lîm-tīn ê ji̍t kau-chiàn chi̍t-iūⁿ.

4當hit日，祂ê腳beh khiā tī橄欖山，chit-ê山tī耶路撒冷頭前ê東勢；橄欖山beh tùi中央裂開，tùi東到西，成做極大ê山谷；山ê一半移徙ǹg北，一半移徙ǹg南。Tng hit-ji̍t, I ê kha beh khiā tī Kaⁿ-ná soaⁿ, chit ê soaⁿ tī Iâ-lō͘-sat-léng thâu-chêng ê tang-sì; Kaⁿ-ná soaⁿ beh tùi tiong-ng li̍h-khui, tùi tang kàu sai, chiâⁿ-chòe ke̍k-tōa ê soaⁿ-kok; soaⁿ ê chi̍t-pòaⁿ î-sóa ǹg-pak, chi̍t-pòaⁿ î-sóa ǹg-lâm.

5Lín beh tùi我ê山谷中逃走，因為山谷beh透到A-sat，lín beh逃走親像猶大王O͘-se-ngá ê年間，為tio̍h地動ê逃走一樣；耶和華我ê上帝beh臨到，lóng總ê聖ê kap你來。Lín beh tùi Góa ê soaⁿ-kok-tiong tô-cháu, in-ūi soaⁿ-kok beh thàu-kàu A-sat, lín beh tô-cháu chhin-chhiūⁿ Iû-tāi ông O͘-se-ngá ê nî-kan, ūi-tio̍h tōe-tāng ê tô-cháu chi̍t-iūⁿ; Iâ-hô-hoa góa ê Siōng-tè beh lîm-kàu, lóng-chóng ê sèng--ê kap Lí lâi.

6Hit日ê光，beh m̄成光m̄成暗。Hit-ji̍t ê kng, beh m̄-chiâⁿ kng m̄-chiâⁿ àm.

7Beh有一個特別日，是耶和華所知ê，m̄是日，也m̄是暝；到ê-hng時chiah有光。Beh ū chi̍t ê te̍k-pia̍t ji̍t, sī Iâ-hô-hoa só͘ chai--ê, m̄-sī ji̍t, iā m̄-sī mî; kàu ê-hng-sî chiah ū kng.

8Hit日beh有活水tùi耶路撒冷出來；一半流去東海，一半流去西海；冬天夏天lóng是án-ni。Hit-ji̍t beh ū oa̍h-chúi tùi Iâ-lō͘-sat-léng chhut--lâi; chi̍t-pòaⁿ lâu-khì tang-hái, chi̍t-pòaⁿ lâu-khì sai-hái; tang-thiⁿ hē-thiⁿ lóng sī án-ni.

9耶和華beh tī全地做王；當hit日耶和華獨一，祂ê名也是獨一。Iâ-hô-hoa beh tī choân-tōe chòe ông; tng hit-ji̍t Iâ-hô-hoa to̍k-it, I ê miâ iā sī to̍k-it.

10全地tùi Ka-pa到耶路撒冷南方ê Lîm-bûn，beh變親像A-la̍h-pa；耶路撒冷beh升高tiàm tī伊ê本所在，就是tùi便雅憫ê門，到頭一個門ê所在，koh到角頭ê門，亦tùi Hap-lâm-gia̍p ê樓，直到王ê酒窟。Choân-tōe tùi Ka-pa kàu Iâ-lō͘-sat-léng lâm-hng ê Lîm-bûn, beh piàn chhin-chhiūⁿ A-la̍h-pa; Iâ-lō͘-sat-léng beh seng-koâiⁿ tiàm tī i ê pún só͘-chāi, chiū-sī tùi Piān-ngá-bín ê mn̂g, kàu thâu-chi̍t-ê mn̂g ê só͘-chāi, koh kàu kak-thâu ê mn̂g, ia̍h tùi Hap-lâm-gia̍p ê lâu, ti̍t-kàu ông ê chiú-khut.

11Beh有人tiàm tī hit中間，無koh有咒詛；耶路撒冷beh安然khiā起。Beh ū lâng tiàm tī hit tiong-kan, bô koh ū chiù-chó͘; Iâ-lō͘-sat-léng beh an-jiân khiā-khí.

12Hiah-ê列國kap耶路撒冷交戰ê，耶和華beh用chit號ê災厄攻擊in；in ê腳iáu khiā-teh ê時，in ê肉beh朽爛，目睭beh朽爛tī目睭孔，舌beh朽爛tī嘴內。Hiah ê lia̍t-kok kap Iâ-lō͘-sat-léng kau-chiàn--ê, Iâ-hô-hoa beh ēng chit-hō ê chai-ē kong-kek in; in ê kha iáu khiā-teh ê sî, in ê bah beh hiú-nōa, ba̍k-chiu beh hiú-nōa tī ba̍k-chiu-khang, chi̍h beh hiú-nōa tī chhùi-lāi.

13當hit日耶和華beh hō͘ in中間大擾亂；in ta̍k人用手相khiú，koh起手相攻擊。Tng hit-ji̍t Iâ-hô-hoa beh hō͘ in tiong-kan tōa jiáu-loān; in ta̍k-lâng ēng chhiú saⁿ-khiú, koh khí-chhiú saⁿ kong-kek.

14猶大也beh kap耶路撒冷交戰；hit時四圍列國ê貨財，就是金、銀、衣裳，beh聚集chōe-chōe。Iû-tāi iā beh kap Iâ-lō͘-sat-léng kau-chiàn; hit-sî sì-ûi lia̍t-kok ê hè-châi, chiū-sī kim, gûn, i-chiûⁿ, beh chū-chi̍p chōe-chōe.

15Hit-ê所beh到tī馬、騾、駱駝、驢，以及營中一切ê cheng-siⁿ ê災厄，kap chit-ê災厄一般樣。Hit-ê só͘ beh kàu tī bé, lô, lo̍k-tô, lû, í-ki̍p iâⁿ-tiong it-chhè ê cheng-siⁿ ê chai-ē, kap chit ê chai-ē chi̍t-poaⁿ-iūⁿ.

16所有來攻擊耶路撒冷ê列國chhun ê人，beh年年上來敬拜大ê王，萬軍ê耶和華，也守搭寮節。Só͘-ū lâi kong-kek Iâ-lō͘-sat-léng ê lia̍t-kok chhun ê lâng, beh nî-nî chiūⁿ-lâi kèng-pài tōa ê Ông, bān-kun ê Iâ-hô-hoa, iā siú Tah-liâu-choeh.

17地上萬族中，見若無上耶路撒冷敬拜大ê王，萬軍ê耶和華ê，beh無落雨tī in hia。Tōe-chiūⁿ bān-cho̍k-tiong, kìⁿ-nā bô chiūⁿ Iâ-lō͘-sat-léng kèng-pài tōa ê Ông, bān-kun ê Iâ-hô-hoa--ê, beh bô lo̍h-hō͘ tī in hia.

18埃及族若無上來，beh無雨tī in hia；beh有災厄，就是耶和華用來攻擊hiah-ê無上來守搭寮節ê列國ê。Ai-ki̍p cho̍k nā bô chiūⁿ-lâi, beh bô hō͘ tī in hia; beh ū chai-ē, chiū-sī Iâ-hô-hoa ēng lâi kong-kek hiah-ê bô chiūⁿ-lâi siú Tah-liâu-choeh ê lia̍t-kok-ê.

19這就是埃及ê刑罰，也是hiah-ê無上來守搭寮節ê列國ê刑罰。Che chiū-sī Ai-ki̍p ê hêng-hoa̍t, iā-sī hiah-ê bô chiūⁿ-lâi siú Tah-liâu-choeh ê lia̍t-kok ê hêng-hoa̍t.

20當hit日，馬ê hâm-lêng beh刻字講，做聖歸tī耶和華；耶和華殿內ê鍋，beh親像壇前ê碗。Tng hit-ji̍t, bé ê hâm-lêng beh khek-jī kóng, Chòe sèng kui tī Iâ-hô-hoa; Iâ-hô-hoa tiān-lāi ê e, beh chhin-chhiūⁿ tôaⁿ-chêng ê óaⁿ.

21見若耶路撒冷kap猶大ê鍋，lóng beh做聖歸萬軍ê耶和華；見若獻祭ê，lóng beh用chiah-ê鍋，煮肉tī hit內面；當hit日，tī萬軍ê耶和華ê殿內，無koh有迦南人。Kìⁿ-nā Iâ-lō͘-sat-léng kap Iû-tāi ê e, lóng beh chòe-sèng kui bān-kun ê Iâ-hô-hoa; kìⁿ-nā hiàn-chè--ê, lóng beh ēng chiah ê e, chú-bah tī hit lāi-bīn; tng hit-ji̍t, tī bān-kun ê Iâ-hô-hoa ê tiān-lāi, bô koh ū Ka-lâm lâng.