1Hit-ê kap我講話ê使者koh來叫我醒，親像人teh睏受叫醒一樣。Hit-ê kap góa kóng-ōe ê sù-chiá koh lâi kiò góa chhíⁿ, chhin-chhiūⁿ lâng teh khùn siū kiò-chhíⁿ chi̍t-iūⁿ.

2伊kā我講，你看見甚麼？我講，我看見，看ah，有一個燈台，是kui支用金做ê，頂面有一個油櫃，燈台頂有七盞燈；頂面ê燈盞，有七條管(kńg)；I kā góa kóng, Lí khòaⁿ-kìⁿ sím-mi̍h? Góa kóng, Góa khòaⁿ-kìⁿ, khòaⁿ ah, ū chi̍t ê teng-tâi, sī kui-ki ēng kim chòe--ê, téng-bīn ū chi̍t-ê iû-kūi, teng-tâi téng ū chhit chóaⁿ teng; téng-bīn ê teng-chóaⁿ, ū chhit-tiâu-kńg;

3koh有兩叢ê橄欖樹，一叢tī油櫃ê chiàⁿ-pêng，一叢tī油櫃ê tò-pêng。koh ū nn̄g-châng ê kaⁿ-ná-chhiū, chi̍t-châng tī iû-kūi ê chiàⁿ-pêng, chi̍t-châng tī iû-kūi ê tò-pêng.

4我問kap我講話ê使者講，我ê主ah，chiah-ê是甚麼？Góa mn̄g kap góa kóng-ōe ê sù-chiá kóng, Góa ê chú ah, chiah-ê sī sím-mi̍h?

5Kap我講話ê使者應我講，你m̄知chiah-ê是甚麼mah？我講，我ê主ah，我m̄知。Kap góa kóng-ōe ê sù-chiá ìn góa kóng, Lí m̄-chai chiah-ê sī sím-mi̍h mah? Góa kóng, Góa ê chú ah, góa m̄-chai.

6伊應我講，這是耶和華吩咐Só͘-lô-pa-pek ê話講，M̄是用權勢，m̄是用能力，就是用我ê神；這是萬軍ê耶和華講ê。I ìn góa kóng, Che sī Iâ-hô-hoa hoan-hù Só͘-lô-pa-pek ê ōe kóng, M̄-sī ēng koân-sè, m̄-sī ēng lêng-le̍k, chiū-sī ēng Góa ê Sîn; che sī bān-kun ê Iâ-hô-hoa kóng--ê.

7大山ah，你是甚麼？tī Só͘-lô-pa-pek ê面前，你beh成做平地；伊beh hō͘厝角頭ê石出來，koh有大歡喜ê聲叫講，恩惠，恩惠歸伊。Tōa-soaⁿ ah, lí sī sím-mi̍h? tī Só͘-lô-pa-pek ê bīn-chêng, lí beh chiâⁿ-chòe pîⁿ-tōe; i beh hō͘ chhù-kak-thâu ê chio̍h chhut-lâi, koh ū tōa hoaⁿ-hí ê siaⁿ kiò kóng, Un-hūi, un-hūi kui i.

8耶和華ê話koh臨到我講，Iâ-hô-hoa ê ōe koh lîm-kàu góa kóng,

9Só͘-lô-pa-pek ê手有hē chit間殿ê地基，伊ê手亦beh完chit-ê工；你就知萬軍ê耶和華差我到lín chia。Só͘-lô-pa-pek ê chhiú ū hē chit keng tiān ê tōe-ki, i ê chhiú ia̍h beh oân chit ê kang; lí chiū chai bān-kun ê Iâ-hô-hoa chhe góa kàu lín chia.

10Chī-chūi看輕chit-ê小khóa事ê日ah？Chit七個，是耶和華ê目睭，往來tī全地，看見Só͘-lô-pa-pek ê手the̍h繩線，就歡喜。Chī-chūi khòaⁿ-khin chit ê sió-khóa sū ê ji̍t ah? Chí(Chit) chhit-ê, sī Iâ-hô-hoa ê ba̍k-chiu, óng-lâi tī choân-tōe, khòaⁿ-kìⁿ Só͘-lô-pa-pek ê chhiú the̍h chîn-sòaⁿ, chiū hoaⁿ-hí.

11我koh問伊講，chit-ê燈台左右兩叢橄欖樹是甚麼意思？Góa koh mn̄g i kóng, Chit ê teng-tâi chó-iū nn̄g châng kaⁿ-ná-chhiū sī sím-mi̍h ì-sù?

12我koh問伊講，橄欖樹ê兩支，tùi兩條金ê管流出金油，是甚麼意思？Góa koh mn̄g i kóng, Kaⁿ-ná-chhiū ê nn̄g-ki, tùi nn̄g-tiâu kim ê kńg lâu-chhut kim-iû, sī sím-mi̍h ì-sù?

13伊應我講，你m̄知chiah-ê是甚麼意思mah？我講，我ê主ah，我m̄知。I ìn góa kóng, Lí m̄-chai chiah-ê sī sím-mi̍h ì-sù mah? Góa kóng, Góa ê chú ah, góa m̄-chai.

14伊講，這是兩個受抹油ê，khiā tī普天下ê主ê邊á。I kóng, Che sī nn̄g ê siū-boah-iû--ê, khiā tī phó͘ thiⁿ-ē ê Chú ê piⁿ-á.

1我koh kia̍h目看見有一幅chhak teh飛。Góa koh kia̍h-ba̍k khòaⁿ-kìⁿ ū chi̍t pak chhak teh pe.

2伊kā我講，你看見甚麼？我應講，我看見一幅chhak teh飛；伊ê長二十肘，闊十肘。I kā góa kóng, Lí khòaⁿ-kìⁿ sím-mi̍h? Góa ìn kóng, Góa khòaⁿ-kìⁿ chi̍t pak chhak teh pe; i ê tn̂g jī-cha̍p tiú, khoah cha̍p-tiú.

3伊就對我講，Chit-ê是出去到全地上ê咒詛；見若偷the̍h-ê，beh照chit幅ê chit-pêng除滅伊；見若chiù-chōa-ê beh照chit幅ê hit-pêng除滅伊。I chiū tùi góa kóng, Chit-ê sī chhut-khì kàu choân-tōe-chiūⁿ ê chiù-chó͘; kìⁿ-nā thau-the̍h-ê, beh chiàu chit-pak ê chit-pêng tû-bia̍t i; kìⁿ-nā chiù-chōa-ê beh chiàu chit-pak ê hit-pêng tû-bia̍t i.

4萬軍ê耶和華講，我beh hō͘伊出去，伊beh入偷the̍h ê人ê厝，也入kí我ê名lām-sám chiù-chōa ê人ê厝；beh tòa tī伊ê厝內毀滅伊，以及伊ê柴伊ê石。Bān-kun ê Iâ-hô-hoa kóng, Góa beh hō͘ i chhut-khì, i beh ji̍p thau-the̍h ê lâng ê chhù, iā ji̍p kí Góa ê miâ lām-sám chiù-chōa ê lâng ê chhù; beh tòa tī i ê chhù-lāi húi-bia̍t i, í-ki̍p i ê chhâ i ê chio̍h.

5Kap我講話ê使者出來對我講，你tio̍h kia̍h目看chit-ê出來ê是甚麼。Kap góa kóng-ōe ê sù-chiá chhut-lâi tùi góa kóng, Lí tio̍h kia̍h-ba̍k khòaⁿ chit ê chhut-lâi-ê sī sím-mi̍h.

6我講，這是甚麼ah？伊講，Chit-ê是出去ê I-hoat。伊koh講，Tī全地ê內面，in ê形狀是án-ni；Góa kóng, Che sī sím-mi̍h ah? I kóng, Chit-ê sī chhut-khì ê i-hoat. I koh kóng, Tī choân-tōe ê lāi-bīn, in ê hêng-chōng sī án-ni;

7(看ah，有一片圓ê鉛受舉起；) koh有婦人人坐tī I-hoat ê內面。(khòaⁿ ah, ū chi̍t-phìⁿ îⁿ ê iân siū kú-khí;) koh ū hū-jîn-lâng chē tī i-hoat ê lāi-bīn.

8伊講，Chit-ê是罪惡；就將伊hiat tī I-hoat ê內面；也將hit片ê鉛蓋tī I-hoat ê嘴。I kóng, Chit-ê sī chōe-ok; chiū chiong i hiat tī i-hoat ê lāi-bīn; iā chiong hit phìⁿ ê iân khàm tī i-hoat ê chhùi.

9我koh kia̍h目看；看ah，有兩個婦人人出來，tī in ê翼有風；in ê翼親像鶴ê翼；in將I-hoat扛起來tī天kap地ê中間。Góa koh kia̍h-ba̍k khòaⁿ; khòaⁿ ah, ū nn̄g ê hū-jîn-lâng chhut-lâi, tī in ê si̍t ū hong; in ê si̍t chhin-chhiūⁿ ho̍h ê si̍t; in chiong i-hoat kng--khí-lâi tī thiⁿ kap tōe ê tiong-kan.

10我對kap我講話ê使者講，In扛I-hoat 去toh-lo̍h？Góa tùi kap góa kóng-ōe ê sù-chiá kóng, In kng i-hoat khì toh-lo̍h?

11伊kā我講，Beh kā伊起厝tī Sī-ná地；厝若便，就將伊安置tī家己ê所在。I kā góa kóng, Beh kā i khí chhù tī Sī-ná tōe; chhù nā piān, chiū chiong i an-tì tī ka-kī ê só͘-chāi.

1我koh kia̍h目看；看ah，有四張車tùi兩個山縫出來，hiah-ê山是銅ê山。Góa koh kia̍h-ba̍k khòaⁿ; khòaⁿ ah, ū sì tiuⁿ chhia tùi nn̄g ê soaⁿ-phāng chhut-lâi, hiah ê soaⁿ sī tâng ê soaⁿ.

2頭一張車掛赤馬；第二張車掛烏馬；Thâu-chi̍t-tiuⁿ chhia kòa chhiah-bé; tē-jī-tiuⁿ chhia kóa o͘-bé;

3第三張車掛白馬；第四張車掛花斑勇ê馬。tē-saⁿ-tiuⁿ chhia kòa pe̍h-bé; tē-sì-tiuⁿ chhia kòa hoe-pan ióng ê bé.

4我就應，對kap我講話ê使者講，我ê主ah，chiah-ê是甚麼？Góa chiū ìn, tùi kap góa kóng-ōe ê sù-chiá kóng, Góa ê chú ah, chiah-ê sī sím-mi̍h?

5使者應我講，Chiah-ê就是天四面ê風；khiā tī全地ê主ê面前，taⁿ tùi-hia出來。Sù-chiá ìn góa kóng, Chiah-ê chiū-sī thiⁿ sì-bīn ê hong; khiā tī choân-tōe ê Chú ê bīn-chêng, taⁿ tùi-hia chhut-lâi.

6掛烏馬ê車出去北方；白馬tè伊ê後面；花斑ê馬出去南方。Kòa o͘-bé ê chhia chhut-khì pak-hng; pe̍h-bé tè i ê āu-bīn; hoe-pan ê bé chhut-khì lâm-hng.

7勇ê馬出來，ài-beh tī全地行來行去；伊講，做lín去，tī全地行來行去；in就tī全地行來行去。Ióng ê bé chhut-lâi, ài-beh tī choân-tōe kiâⁿ-lâi kiâⁿ-khì; i kóng, Chòe lín khì, tī choân-tōe kiâⁿ-lâi kiâⁿ-khì; in chiū tī choân-tōe kiâⁿ-lâi kiâⁿ-khì.

8伊叫我，kā我講，看ah，去北方ê已經tī北方安我ê心。I kiò góa, kā góa kóng, Khòaⁿ ah, khì pak-hng-ê í-keng tī pak-hng an góa ê sim.

9耶和華ê話臨到我講，Iâ-hô-hoa ê ōe lîm-kàu góa kóng,

10你tio̍h tùi hiah-ê受掠ê人ê中間，就是tùi Hek-tāi，tùi To-pí-ngá，tùi Iâ-tāi-ngá領受金銀；koh tī hit日你tio̍h入去Se-hoan-ngá ê kiáⁿ約西亞ê厝，就是in tùi巴比倫倒tńg來所到ê厝；Lí tio̍h tùi hiah ê siū-lia̍h ê lâng ê tiong-kan, chiū-sī tùi Hek-tāi, tùi To-pí-ngá, tùi Iâ-tāi-ngá niá-siū kim-gûn; koh tī hit-ji̍t lí tio̍h ji̍p--khì Se-hoan-ngá ê kiáⁿ Iok-se-a ê chhù, chiū-sī in tùi Pa-pí-lûn tò-tńg-lâi só͘ kàu ê chhù;

11領受金銀做冕旒，戴tī Iok-sat-tap ê kiáⁿ，祭司頭約書亞，ê頭殼；niá-siū kim-gûn chòe bián-liû, tì tī Iok-sat-tap ê kiáⁿ, chè-si-thâu Iok-su-a, ê thâu-khak;

12對伊講，萬軍ê耶和華án-ni講，看ah，hit-ê稱做樹枝ê人，伊beh對伊ê根頭發起來，也beh起耶和華ê殿；tùi i kóng, Bān-kun ê Iâ-hô-hoa án-ni kóng, Khòaⁿ ah, hit ê chheng-chòe Chhiū-ki ê lâng, i beh tùi i ê kun-thâu hoat--khí-lâi, iā beh khí Iâ-hô-hoa ê tiān;

13伊beh起耶和華ê殿，伊也beh得tio̍h榮光，坐伊ê寶座來治理，也beh tī伊ê寶座做祭司；tī in兩個ê中間有和平ê計畫。i beh khí Iâ-hô-hoa ê tiān, i iā beh tit-tio̍h êng-kng, chē i ê pó-chō lâi tī-lí, iā beh tī i ê pó-chō chòe chè-si; tī in nn̄g-ê ê tiong-kan ū hô-pêng ê kè-e̍k.

14冕旒beh歸tī禧年，To-pí-ngá、Iâ-tāi-ngá，kap Se-hoan-ngá ê kiáⁿ Hiân，hē tī耶和華ê殿做記念。Bián-liû beh kui tī Hi-liân, To-pí-ngá, Iâ-tāi-ngá, kap Se-hoan-ngá ê kiáⁿ Hiân, hē tī Iâ-hô-hoa ê tiān chòe kì-liām.

15遠ê人也beh來，有份tī起耶和華ê殿；lín就知萬軍ê耶和華差我到lín chia。Lín若注意聽thàn耶和華，lín ê上帝ê話，就beh有chit-ê tāi-chì。Hn̄g ê lâng iā beh lâi, ū hūn tī khí Iâ-hô-hoa ê tiān; lín chiū chai bān-kun ê Iâ-hô-hoa chhe góa kàu lín chia. Lín nā chù-ì thiaⁿ-thàn Iâ-hô-hoa, lín ê Siōng-tè ê ōe, chiū beh ū chit ê tāi-chì.