1我koh kia̍h目看見有一幅chhak teh飛。Góa koh kia̍h-ba̍k khòaⁿ-kìⁿ ū chi̍t pak chhak teh pe.

2伊kā我講，你看見甚麼？我應講，我看見一幅chhak teh飛；伊ê長二十肘，闊十肘。I kā góa kóng, Lí khòaⁿ-kìⁿ sím-mi̍h? Góa ìn kóng, Góa khòaⁿ-kìⁿ chi̍t pak chhak teh pe; i ê tn̂g jī-cha̍p tiú, khoah cha̍p-tiú.

3伊就對我講，Chit-ê是出去到全地上ê咒詛；見若偷the̍h-ê，beh照chit幅ê chit-pêng除滅伊；見若chiù-chōa-ê beh照chit幅ê hit-pêng除滅伊。I chiū tùi góa kóng, Chit-ê sī chhut-khì kàu choân-tōe-chiūⁿ ê chiù-chó͘; kìⁿ-nā thau-the̍h-ê, beh chiàu chit-pak ê chit-pêng tû-bia̍t i; kìⁿ-nā chiù-chōa-ê beh chiàu chit-pak ê hit-pêng tû-bia̍t i.

4萬軍ê耶和華講，我beh hō͘伊出去，伊beh入偷the̍h ê人ê厝，也入kí我ê名lām-sám chiù-chōa ê人ê厝；beh tòa tī伊ê厝內毀滅伊，以及伊ê柴伊ê石。Bān-kun ê Iâ-hô-hoa kóng, Góa beh hō͘ i chhut-khì, i beh ji̍p thau-the̍h ê lâng ê chhù, iā ji̍p kí Góa ê miâ lām-sám chiù-chōa ê lâng ê chhù; beh tòa tī i ê chhù-lāi húi-bia̍t i, í-ki̍p i ê chhâ i ê chio̍h.

5Kap我講話ê使者出來對我講，你tio̍h kia̍h目看chit-ê出來ê是甚麼。Kap góa kóng-ōe ê sù-chiá chhut-lâi tùi góa kóng, Lí tio̍h kia̍h-ba̍k khòaⁿ chit ê chhut-lâi-ê sī sím-mi̍h.

6我講，這是甚麼ah？伊講，Chit-ê是出去ê I-hoat。伊koh講，Tī全地ê內面，in ê形狀是án-ni；Góa kóng, Che sī sím-mi̍h ah? I kóng, Chit-ê sī chhut-khì ê i-hoat. I koh kóng, Tī choân-tōe ê lāi-bīn, in ê hêng-chōng sī án-ni;

7(看ah，有一片圓ê鉛受舉起；) koh有婦人人坐tī I-hoat ê內面。(khòaⁿ ah, ū chi̍t-phìⁿ îⁿ ê iân siū kú-khí;) koh ū hū-jîn-lâng chē tī i-hoat ê lāi-bīn.

8伊講，Chit-ê是罪惡；就將伊hiat tī I-hoat ê內面；也將hit片ê鉛蓋tī I-hoat ê嘴。I kóng, Chit-ê sī chōe-ok; chiū chiong i hiat tī i-hoat ê lāi-bīn; iā chiong hit phìⁿ ê iân khàm tī i-hoat ê chhùi.

9我koh kia̍h目看；看ah，有兩個婦人人出來，tī in ê翼有風；in ê翼親像鶴ê翼；in將I-hoat扛起來tī天kap地ê中間。Góa koh kia̍h-ba̍k khòaⁿ; khòaⁿ ah, ū nn̄g ê hū-jîn-lâng chhut-lâi, tī in ê si̍t ū hong; in ê si̍t chhin-chhiūⁿ ho̍h ê si̍t; in chiong i-hoat kng--khí-lâi tī thiⁿ kap tōe ê tiong-kan.

10我對kap我講話ê使者講，In扛I-hoat 去toh-lo̍h？Góa tùi kap góa kóng-ōe ê sù-chiá kóng, In kng i-hoat khì toh-lo̍h?

11伊kā我講，Beh kā伊起厝tī Sī-ná地；厝若便，就將伊安置tī家己ê所在。I kā góa kóng, Beh kā i khí chhù tī Sī-ná tōe; chhù nā piān, chiū chiong i an-tì tī ka-kī ê só͘-chāi.

1我koh kia̍h目看；看ah，有四張車tùi兩個山縫出來，hiah-ê山是銅ê山。Góa koh kia̍h-ba̍k khòaⁿ; khòaⁿ ah, ū sì tiuⁿ chhia tùi nn̄g ê soaⁿ-phāng chhut-lâi, hiah ê soaⁿ sī tâng ê soaⁿ.

2頭一張車掛赤馬；第二張車掛烏馬；Thâu-chi̍t-tiuⁿ chhia kòa chhiah-bé; tē-jī-tiuⁿ chhia kóa o͘-bé;

3第三張車掛白馬；第四張車掛花斑勇ê馬。tē-saⁿ-tiuⁿ chhia kòa pe̍h-bé; tē-sì-tiuⁿ chhia kòa hoe-pan ióng ê bé.

4我就應，對kap我講話ê使者講，我ê主ah，chiah-ê是甚麼？Góa chiū ìn, tùi kap góa kóng-ōe ê sù-chiá kóng, Góa ê chú ah, chiah-ê sī sím-mi̍h?

5使者應我講，Chiah-ê就是天四面ê風；khiā tī全地ê主ê面前，taⁿ tùi-hia出來。Sù-chiá ìn góa kóng, Chiah-ê chiū-sī thiⁿ sì-bīn ê hong; khiā tī choân-tōe ê Chú ê bīn-chêng, taⁿ tùi-hia chhut-lâi.

6掛烏馬ê車出去北方；白馬tè伊ê後面；花斑ê馬出去南方。Kòa o͘-bé ê chhia chhut-khì pak-hng; pe̍h-bé tè i ê āu-bīn; hoe-pan ê bé chhut-khì lâm-hng.

7勇ê馬出來，ài-beh tī全地行來行去；伊講，做lín去，tī全地行來行去；in就tī全地行來行去。Ióng ê bé chhut-lâi, ài-beh tī choân-tōe kiâⁿ-lâi kiâⁿ-khì; i kóng, Chòe lín khì, tī choân-tōe kiâⁿ-lâi kiâⁿ-khì; in chiū tī choân-tōe kiâⁿ-lâi kiâⁿ-khì.

8伊叫我，kā我講，看ah，去北方ê已經tī北方安我ê心。I kiò góa, kā góa kóng, Khòaⁿ ah, khì pak-hng-ê í-keng tī pak-hng an góa ê sim.

9耶和華ê話臨到我講，Iâ-hô-hoa ê ōe lîm-kàu góa kóng,

10你tio̍h tùi hiah-ê受掠ê人ê中間，就是tùi Hek-tāi，tùi To-pí-ngá，tùi Iâ-tāi-ngá領受金銀；koh tī hit日你tio̍h入去Se-hoan-ngá ê kiáⁿ約西亞ê厝，就是in tùi巴比倫倒tńg來所到ê厝；Lí tio̍h tùi hiah ê siū-lia̍h ê lâng ê tiong-kan, chiū-sī tùi Hek-tāi, tùi To-pí-ngá, tùi Iâ-tāi-ngá niá-siū kim-gûn; koh tī hit-ji̍t lí tio̍h ji̍p--khì Se-hoan-ngá ê kiáⁿ Iok-se-a ê chhù, chiū-sī in tùi Pa-pí-lûn tò-tńg-lâi só͘ kàu ê chhù;

11領受金銀做冕旒，戴tī Iok-sat-tap ê kiáⁿ，祭司頭約書亞，ê頭殼；niá-siū kim-gûn chòe bián-liû, tì tī Iok-sat-tap ê kiáⁿ, chè-si-thâu Iok-su-a, ê thâu-khak;

12對伊講，萬軍ê耶和華án-ni講，看ah，hit-ê稱做樹枝ê人，伊beh對伊ê根頭發起來，也beh起耶和華ê殿；tùi i kóng, Bān-kun ê Iâ-hô-hoa án-ni kóng, Khòaⁿ ah, hit ê chheng-chòe Chhiū-ki ê lâng, i beh tùi i ê kun-thâu hoat--khí-lâi, iā beh khí Iâ-hô-hoa ê tiān;

13伊beh起耶和華ê殿，伊也beh得tio̍h榮光，坐伊ê寶座來治理，也beh tī伊ê寶座做祭司；tī in兩個ê中間有和平ê計畫。i beh khí Iâ-hô-hoa ê tiān, i iā beh tit-tio̍h êng-kng, chē i ê pó-chō lâi tī-lí, iā beh tī i ê pó-chō chòe chè-si; tī in nn̄g-ê ê tiong-kan ū hô-pêng ê kè-e̍k.

14冕旒beh歸tī禧年，To-pí-ngá、Iâ-tāi-ngá，kap Se-hoan-ngá ê kiáⁿ Hiân，hē tī耶和華ê殿做記念。Bián-liû beh kui tī Hi-liân, To-pí-ngá, Iâ-tāi-ngá, kap Se-hoan-ngá ê kiáⁿ Hiân, hē tī Iâ-hô-hoa ê tiān chòe kì-liām.

15遠ê人也beh來，有份tī起耶和華ê殿；lín就知萬軍ê耶和華差我到lín chia。Lín若注意聽thàn耶和華，lín ê上帝ê話，就beh有chit-ê tāi-chì。Hn̄g ê lâng iā beh lâi, ū hūn tī khí Iâ-hô-hoa ê tiān; lín chiū chai bān-kun ê Iâ-hô-hoa chhe góa kàu lín chia. Lín nā chù-ì thiaⁿ-thàn Iâ-hô-hoa, lín ê Siōng-tè ê ōe, chiū beh ū chit ê tāi-chì.

1Tāi-lī-o͘王四年九月，就是Ki-su-liû月，初四，耶和華ê話臨到撒迦利亞。Tāi-lī-o͘ ông sì-nî káu-ge̍h, chiū-sī Ki-su-liû ge̍h, chhoe sì, Iâ-hô-hoa ê ōe lîm-kàu Sat-ka-lī-a.

2Hit時Pek-te̍k-lī人已經差Sa-lī-sek kap Lī-kian-bí-le̍k kap tè in ê人去求恩 tī耶和華，Hit-sî Pek-te̍k-lī lâng í-keng chhe Sa-lī-sek kap Lī-kian-bí-le̍k kap tè in ê lâng khì kiû-un tī Iâ-hô-hoa,

3也問萬軍ê耶和華殿內ê祭司以及先知講，我歷年以來tī五月間啼哭家己分別，taⁿ iáu-kú tio̍h án-ni行mah？iā mn̄g bān-kun ê Iâ-hô-hoa tiān-lāi ê chè-si í-ki̍p sian-ti kóng, Góa le̍k-nî í-lâi tī gō͘-ge̍h-kan thî-khàu ka-kī hun-piat, taⁿ iáu-kú tio̍h án-ni kiâⁿ mah?

4萬軍ê耶和華ê話臨到我講，Bān-kun ê Iâ-hô-hoa ê ōe lîm-kàu góa kóng,

5你tio̍h kā chit所在ê眾百姓kap祭司講，Lín七十年久，tī五月七月禁食悲哀kiám是為tio̍h我，為tio̍h我，禁食mah？Lí tio̍h kā chit só͘-chāi ê chèng peh-sìⁿ kap chè-si kóng, Lín chhit-cha̍p nî kú, tī gō͘-ge̍h chhit-ge̍h kìm-chia̍h pi-ai kiám-sī ūi-tio̍h Góa, ūi-tio̍h Góa, kìm-chia̍h mah?

6Lín或是食或是lim，kiám m̄是lín teh食，lín teh-lim mah？Lín he̍k-sī chia̍h he̍k-sī lim, kiám m̄-sī lín teh-chia̍h, lín teh-lim mah?

7當耶路撒冷kap四圍ê城有khiā起ê百姓koh豐盛，南方kap平洋有人khiā起ê時，耶和華託重前ê先知所宣傳ê話，lín kiám m̄-tio̍h聽mah？Tng Iâ-lō͘-sat-léng kap sì-ûi ê siâⁿ ū khiā-khí ê peh-sìⁿ koh hong-sēng, lâm-hng kap pîⁿ-iûⁿ ū lâng khiā-khí ê sî, Iâ-hô-hoa thok-tiōng chêng ê sian-ti só͘ soan-thoân ê ōe, lín kiám-m̄-tio̍h thiaⁿ mah?

8耶和華ê話koh臨到撒迦利亞講，萬軍ê耶和華bat án-ni講，Iâ-hô-hoa ê ōe koh lîm-kàu Sat-ka-lī-a kóng, Bān-kun ê Iâ-hô-hoa bat án-ni kóng,

9Tio̍h照真實ê公平來審判，大家用慈愛憐憫來相款待；Tio̍h chiàu chin-si̍t ê kong-pêng lâi sím-phòaⁿ, tāi-ke ēng chû-ài lîn-bín lâi saⁿ khoán-thāi;

10m̄-thang欺負寡婦、孤兒、出外人，kap sòng-hiong人；m̄-thang心內計謀pháiⁿ-tāi來相陷害。m̄-thang khi-hū kóaⁿ-hū ko͘-jî, chhut-gōa lâng, kap sòng-hiong lâng; m̄-thang sim-lāi kè-bô͘ pháiⁿ-tāi lâi saⁿ-hām-hāi.

11總是in m̄肯聽thàn，oa̍t-tńg肩頭悖逆，塞密in ê耳孔致到bōe聽。Chóng-sī in m̄-khéng thiaⁿ-thàn, oa̍t-tńg keng-thâu pōe-ge̍k, that-ba̍t in ê hī-khang tì-kàu bōe thiaⁿ.

12Koh hō͘ in ê心硬親像鑽石，免得聽律法，kap萬軍ê耶和華用祂ê神託前ê先知所講ê話；所以萬軍ê耶和華大大發受氣。Koh hō͘ in ê sim ngī chhin-chhiūⁿ soān-chio̍h, bián-tit thiaⁿ lu̍t-hoat, kap bān-kun ê Iâ-hô-hoa ēng I ê Sîn thok chêng ê sian-ti só͘ kóng ê ōe; só͘-í bān-kun ê Iâ-hô-hoa tōa-tōa hoat siū-khì.

13因為祂bat叫，in m̄聽，án-ni in beh叫，我也m̄聽；這是萬軍ê耶和華講ê；In-ūi I bat kiò, in m̄-thiaⁿ, án-ni in beh kiò, Góa iā m̄-thiaⁿ; che sī bān-kun ê Iâ-hô-hoa kóng--ê;

14但是我beh用捲螺風吹散in到in所m̄-bat ê列國。Án-ni chit-ê地tī in去ê了後變做拋荒，致到無人往來經過；因為in hō͘ thang歡喜ê地拋荒lah。nā-sī Góa beh ēng kńg-lê-hong chhe-sòaⁿ in kàu in só͘ m̄-bat ê lia̍t-kok. Án-ni chit ê tōe tī in khì ê liáu-āu pìⁿ-chòe pha-hng, tì-kàu bô lâng óng-lâi keng-kè; in-ūi in hō͘ thang hoaⁿ-hí ê tōe pha-hng lah.