1萬軍ê耶和華ê話臨到[我]，講，Bān-kun ê Iâ-hô-hoa ê ōe lîm-kàu [góa], kóng,

2萬軍ê耶和華án-ni講，我為tio̍h錫安極其熱心，我為tio̍h伊熱心，發出大受氣。Bān-kun ê Iâ-hô-hoa án-ni kóng, Góa ūi-tio̍h Sek-an ke̍k-kî jia̍t-sim, Góa ūi-tio̍h i jia̍t-sim, hoat-chhut tōa siū-khì.

3耶和華án-ni講：我taⁿ tò來錫安，beh tiàm tī耶路撒冷ê中間；耶路撒冷beh稱做誠實ê城；萬軍ê耶和華ê山beh稱做聖ê山。Iâ-hô-hoa án-ni kóng: Góa taⁿ tò--lâi Sek-an, beh tiàm tī Iâ-lō͘-sat-léng ê tiong-kan; Iâ-lō͘-sat-léng beh chheng-chòe Sêng-si̍t ê siâⁿ; bān-kun ê Iâ-hô-hoa ê soaⁿ beh chheng-chòe Sèng ê soaⁿ.

4萬軍ê耶和華án-ni講：將來beh有老ê ta-po͘人、老ê婦人人坐tī耶路撒冷闊ê街路，因為年老ta̍k-ê kia̍h柺á。Bān-kun ê Iâ-hô-hoa án-ni kóng: Chiong-lâi beh ū lāu ê ta-po͘-lâng lāu ê hū-jîn-lâng chē tī Iâ-lō͘-sat-léng khoah ê ke-lō͘, in-ūi nî-lāu ta̍k-ê kia̍h koáiⁿ-á.

5城內闊ê街路beh有ta-po͘-gín-ná cha-bó͘ gín-ná滿滿thit-thô tī hit-ê街路中。Siâⁿ-lāi khoah ê ke-lō͘ beh ū ta-po͘-gín-ná cha-bó͘ gín-ná móa-móa thit-thô tī hit ê ke-lō͘-tiong.

6萬軍ê耶和華án-ni講，當日所chhun ê百姓看這做奇怪，我kiám也看做奇怪mah？這是萬軍ê耶和華講ê。Bān-kun ê Iâ-hô-hoa án-ni kóng, Tng-ji̍t só͘ chhun ê peh-sìⁿ khòaⁿ che chòe kî-koài, Góa kiám iā khòaⁿ chòe kî-koài mah? Che sī bān-kun ê Iâ-hô-hoa kóng--ê.

7萬軍ê耶和華án-ni講：看ah，我beh救我ê百姓tùi日出ê所在也tùi日落ê所在tò來；Bān-kun ê Iâ-hô-hoa án-ni kóng: Khòaⁿ ah, Góa beh kiù Góa ê peh-sìⁿ tùi ji̍t-chhut ê só͘-chāi iā tùi ji̍t-lo̍h ê só͘-chāi tò--lâi;

8我beh chhōa in來，in beh khiā起tī耶路撒冷ê中間；in beh做我ê百姓，我beh做in ê上帝，憑誠實kap公義。Góa beh chhōa in lâi, in beh khiā-khí tī Iâ-lō͘-sat-léng ê tiong-kan; in beh chòe Góa ê peh-sìⁿ, Góa beh chòe in ê Siōng-tè, pîn sêng-si̍t kap kong-gī.

9萬軍ê耶和華án-ni講：當hē萬軍ê耶和華ê厝ê地基，thang起殿堂，hit日先知所講ê話，現在lín聽見，taⁿ tio̍h勇壯lín ê手。Bān-kun ê Iâ-hô-hoa án-ni kóng: Tng hē bān-kun ê Iâ-hô-hoa ê chhù ê tōe-ki, thang khí tiān-tn̂g, hit-ji̍t sian-ti só͘ kóng ê ōe, hiān-chāi lín thiaⁿ-kìⁿ, taⁿ tio̍h ióng-chòng lín ê chhiú.

10Hit日以前人無得tio̍h工錢，cheng-siⁿ也無得tio̍h工錢，koh因為對敵ê緣故，出入ê人無得tio̍h平安；因為我hō͘眾人相攻擊。Hit-ji̍t í-chêng lâng bô tit-tio̍h kang-chîⁿ, cheng-siⁿ iā bô tit-tio̍h kang-chîⁿ, koh in-ūi tùi-te̍k ê iân-kò͘, chhut-ji̍p ê lâng bô tit-tio̍h pêng-an; in-ūi Góa hō͘ chèng-lâng saⁿ kong-kek.

11總是我taⁿ款待chiah-ê chhun ê百姓無beh親像前ê日；這是萬軍ê耶和華講ê。Chóng-sī Góa taⁿ khoán-thāi chiah ê chhun ê peh-sìⁿ bô beh chhin-chhiūⁿ chêng ê ji̍t; che sī bān-kun ê Iâ-hô-hoa kóng--ê.

12因為beh有平安ê種子，葡萄樹beh結果子，地beh出土產，天beh落露水；我beh hō͘ chiah-ê chhun ê百姓承受chiah-ê一切。In-ūi beh ū pêng-an ê chéng-chí, phû-tô-chhiū beh kiat ké-chí, tōe beh chhut thó͘-sán, thiⁿ beh lo̍h lō͘-chúi; Góa beh hō͘ chiah ê chhun ê peh-sìⁿ sêng-siū chiah-ê it-chhè.

13猶大家kap以色列家ah，前tī列國中引起lín來咒詛，án-ni我beh拯救lín，hō͘人引起lín來祝福；lín莫得驚，lín ê手tio̍h勇壯。Iû-tāi ke kap Í-sek-lia̍t ke ah, chêng tī lia̍t-kok-tiong ín-khí lín lâi chiù-chó͘, án-ni góa beh chín-kiù lín, hō͘ lâng ín-khí lín lâi chiok-hok; lín bo̍h-tit kiaⁿ, lín ê chhiú tio̍h ióng-chòng.

14因為萬軍ê耶和華án-ni講：Lín ê列祖惹我ê受氣ê時，我想beh降災厄tī lín，也無退悔；In-ūi bān-kun ê Iâ-hô-hoa án-ni kóng: Lín ê lia̍t-chó͘ jiá Góa ê siū-khì ê sî, Góa siūⁿ beh kàng chai-ē tī lín, iā bô thè-hóe;

15taⁿ我也án-ni想beh施恩hō͘耶路撒冷kap猶大家；lín莫得驚；這是耶和華講ê。taⁿ Góa iā án-ni siūⁿ beh si-un hō͘ Iâ-lō͘-sat-léng kap Iû-tāi ke; lín bo̍h-tit kiaⁿ; che sī Iâ-hô-hoa kóng--ê.

16Lín所應該行ê是án-ni：ta̍k人kap厝邊講話誠實；tī lín ê城門行誠實kap和平ê審判；Lín só͘ eng-kai kiâⁿ-ê sī án-ni: Ta̍k-lâng kap chhù-piⁿ kóng-ōe sêng-si̍t; tī lín ê siâⁿ-mn̂g kiâⁿ sêng-si̍t kap hô-pêng ê sím-phòaⁿ;

17心內m̄-thang計謀pháiⁿ-tāi，害厝邊；m̄-thang ài lām-sám chiù-chōa；因為chiah-ê事lóng是我所怨恨ê；這是耶和華講ê。sim-lāi m̄-thang kè-bô͘ pháiⁿ-tāi, hāi chhù-piⁿ; m̄-thang ài lām-sám chiù-chōa; in-ūi chiah ê sū lóng sī Góa só͘ oàn-hūn--ê; che sī Iâ-hô-hoa kóng--ê.

18萬軍ê耶和華ê話臨到我講，Bān-kun ê Iâ-hô-hoa ê ōe lîm-kàu góa kóng,

19萬軍ê耶和華án-ni講：四月ê禁食，五月ê禁食，七月ê禁食，十月ê禁食，tī猶大家beh做歡喜快樂，得意ê節期；所以lín tio̍h意愛誠實kap和平。Bān-kun ê Iâ-hô-hoa án-ni kóng: Sì-ge̍h ê kìm-chia̍h, gō͘-ge̍h ê kìm-chia̍h, chhit-ge̍h ê kìm-chia̍h, cha̍p-ge̍h ê kìm-chia̍h, tī Iû-tāi ke beh chòe hoaⁿ-hí khoài-lo̍k, tek-ì ê choeh-kî; só͘-í lín tio̍h ì-ài sêng-si̍t kap hô-pêng.

20萬軍ê耶和華án-ni講：將來有列國ê人kap chōe-chōe城khiā起ê百姓beh到；Bān-kun ê Iâ-hô-hoa án-ni kóng: Chiong-lâi ū lia̍t-kok ê lâng kap chōe-chōe siâⁿ khiā-khí ê peh-sìⁿ beh kàu;

21khiā起chit-ê城ê百姓beh到hit-ê城，講，咱tio̍h緊緊去求耶和華ê恩，去chhē萬軍ê耶和華；論到我，我也beh去。khiā-khí chit ê siâⁿ ê peh-sìⁿ beh kàu hit ê siâⁿ, kóng, Lán tio̍h kín-kín khì kiû Iâ-hô-hoa ê un, khì chhē bān-kun ê Iâ-hô-hoa; lūn-kàu góa, góa iā beh khì.

22Beh有chōe-chōe百姓kap強大ê國來耶路撒冷chhē萬軍ê耶和華，求耶和華ê恩。Beh ū chōe-chōe peh-sìⁿ kap kiông-tōa ê kok lâi Iâ-lō͘-sat-léng chhē bān-kun ê Iâ-hô-hoa, kiû Iâ-hô-hoa ê un.

23萬軍ê耶和華án-ni講：當hiah-ê日tùi列國萬族中beh有十人擒一個猶大人ê衫á裾，擒伊，講，阮beh kap lín相kap去，因為阮聽見上帝kap lín tī-teh。Bān-kun ê Iâ-hô-hoa án-ni kóng: Tng hiah ê ji̍t tùi lia̍t-kok bān-cho̍k-tiong beh ū cha̍p-lâng khîⁿ chi̍t ê Iû-tāi lâng ê saⁿ-á-ku, khîⁿ i, kóng, Goán beh kap lín saⁿ-kap khì, in-ūi goán thiaⁿ-kìⁿ Siōng-tè kap lín tī-teh.

1耶和華默示ê話到tī Hap-tek-la̍h，也beh停歇tī大馬色；(因為世間人kap以色列ta̍k支派ê目睭lóng ǹg耶和華) ，kap óa近ê Hap-má；Iâ-hô-hoa be̍k-sī ê ōe kàu tī Hap-tek-la̍h, iā beh thêng-hioh tī Tāi-má-sek; (in-ūi sè-kan lâng kap Í-sek-lia̍t ta̍k chi-phài ê ba̍k-chiu lóng ǹg Iâ-hô-hoa), kap óa-kūn ê Hap-má;

2以及Chhui-lô、Se-tùn，因為伊有大智慧。í-ki̍p Chhui-lô Se-tùn, in-ūi i ū tōa tì-hūi.

3因為Chhui-lô為家己起衛所，積聚銀親像土沙，積聚好金親像街路ê土糜。In-ūi Chhui-lô ūi ka-kī khí ōe-só͘, chek-chū gûn chhin-chhiūⁿ thô͘-soa, chek-chū hó-kim chhin-chhiūⁿ ke-lō͘ ê thô͘-bê.

4看ah，主beh趕伊出，也beh敗壞伊ê海權；伊beh hō͘火燒滅。Khòaⁿ ah, Chú beh kóaⁿ i chhut, iā beh pāi-hoāi i ê hái-koân; i beh hō͘ hé sio-bia̍t.

5A-si̍t-ki-lûn beh看見來驚；Ka-sat看見，也真艱苦；Í-kek-lûn也看見，因為失望來見笑；Ka-sat的確無koh有君王，A-si̍t-ki-lûn無人khiā起。A-si̍t-ki-lûn beh khòaⁿ-kìⁿ lâi kiaⁿ; Ka-sat khòaⁿ-kìⁿ, iā chin kan-khó͘; Í-kek-lûn iā khòaⁿ-kìⁿ, in-ūi sit-bāng lâi kiàn-siàu; Ka-sat tek-khak bô koh ū kun-ông, A-si̍t-ki-lûn bô lâng khiā-khí.

6雜種人beh khiā起tī A-si̍t-tu̍t；我beh除滅腓利士人ê驕傲。Cha̍p-chéng-lâng beh khiā-khí tī A-si̍t-tu̍t; Góa beh tû-bia̍t Hui-lī-sū lâng ê kiau-ngō͘.

7我beh除去伊嘴內kâⁿ血ê肉，kap伊嘴齒中可惡ê物；伊所chhun ê人beh歸咱ê上帝；伊beh tī猶大親像族長；Í-kek-lûn beh親像Iâ-pò͘-su ê人。Góa beh tû--khì i chhùi-lāi kâⁿ huih ê bah, kap i chhùi-khí tiong khó-ò͘ⁿ ê mi̍h; i só͘ chhun ê lâng beh kui lán ê Siōng-tè; i beh tī Iû-tāi chhin-chhiūⁿ cho̍k-tiúⁿ; Í-kek-lûn beh chhin-chhiūⁿ Iâ-pò͘-su ê lâng.

8我beh紮營圍我ê厝，抵擋軍兵，致到無人往來；暴虐ê人也無tùi in hia經過；因為我taⁿ親目看見伊。Góa beh chat-iâⁿ ûi Góa ê chhù, tí-tng kun-peng, tì-kàu bô lâng óng-lâi; pō-gio̍k ê lâng iā bô tùi in hia keng-kè; in-ūi Góa taⁿ chhin-ba̍k khòaⁿ-kìⁿ i.

9錫安ê cha-bó͘-kiáⁿ ah，tio̍h大沉歡喜，耶路撒冷ê cha-bó͘-kiáⁿ ah，tio̍h出歡喜ê聲；看ah，你ê王來就近你；伊是公義koh行拯救，溫柔，koh騎驢kap驢所生ê驢á-kiáⁿ。Sek-an ê cha-bó͘-kiáⁿ ah, tio̍h tōa-tîm hoaⁿ-hí, Iâ-lō͘-sat-léng ê cha-bó͘-kiáⁿ ah, tio̍h chhut hoaⁿ-hí ê siaⁿ; khòaⁿ ah, lí ê ông lâi chiū-kūn lí; i sī kong-gī koh kiâⁿ chín-kiù, un-jiû, koh khiâ-lû kap lû só͘ siⁿ ê lû-á-kiáⁿ.

10我beh除去Í-hoat-liân ê戰車kap耶路撒冷ê戰馬，交戰ê弓也beh除去；祂beh對列國傳和平；祂ê權柄beh tùi chit-ê海到hit-ê海，tùi大河到地極。Góa beh tû--khì Í-hoat-liân ê chiàn-chhia kap Iâ-lō͘-sat-léng ê chiàn-bé, kau-chiàn ê keng iā beh tû--khì; I beh tùi lia̍t-kok thoân hô-pêng; I ê koân-pèng beh tùi chit ê hái kàu hit ê hái, tùi Tōa-hô kàu tōe-ke̍k.

11論到你，我用你ê約ê血，tháu放你hiah-ê受掠去關ê人出無水ê井。Lūn-kàu lí, Góa ēng lí ê iok ê huih, tháu-pàng lí hiah ê siū-lia̍h-khì koaiⁿ ê lâng chhut bô chúi ê chíⁿ.

12Lín hiah-ê受掠去關也有ǹg望ê人ah，tio̍h tò來衛所；我今á日傳播，beh加倍還你。Lín hiah ê siū-lia̍h-khì koaiⁿ iā ū ǹg-bāng ê lâng ah, tio̍h tò--lâi ōe-só͘; Góa kin-á-ji̍t thoân-pò͘, beh ka-pē hêng lí.

13我用猶大做我所挽ê弓，用Í-hoat-liân做安tī弓ê箭；錫安ah，我beh激動你ê百姓攻擊Ngá-oân ê百姓，hō͘你親像勇士ê刀劍。Góa ēng Iû-tāi chòe Góa só͘ bán ê keng, ēng Í-hoat-liân chòe an tī keng ê chìⁿ; Sek-an ah, Góa beh kek-tōng lí ê peh-sìⁿ kong-kek Ngá-oân ê peh-sìⁿ, hō͘ lí chhin-chhiūⁿ ióng-sū ê to-kiàm.

14耶和華beh出現tī in ê頂面；祂ê箭beh射出親像sih-nà；主耶和華beh pûn哨角，坐南方ê捲螺風來行。Iâ-hô-hoa beh chhut-hiān tī in ê téng-bīn; I ê chìⁿ beh siā-chhut chhin-chhiūⁿ sih-nà; Chú Iâ-hô-hoa beh pûn sàu-kak, chē lâm-hng ê kńg-lê-hong lâi kiâⁿ.

15萬軍ê耶和華beh保護in；in beh吞滅對敵，thún踏所hiat來ê石；in beh lim來hoah，親像lim酒；in beh親像貯滿ê碗，親像壇頂hiah-ê角。Bān-kun ê Iâ-hô-hoa beh pó-hō͘ in; in beh thun-bia̍t tùi-te̍k, thún-ta̍h só͘ hiat-lâi ê chio̍h; in beh lim lâi hoah, chhin-chhiūⁿ lim-chiú; in beh chhin-chhiūⁿ tóe-móa ê óaⁿ, chhin-chhiūⁿ tôaⁿ-téng hiah ê kak.

16Hit日耶和華in ê上帝beh拯救in，親像祂ê百姓ê羊群；因為in beh親像冕旒ê寶石，舉起高高tī祂ê地上。Hit-ji̍t Iâ-hô-hoa in ê Siōng-tè beh chín-kiù in, chhin-chhiūⁿ I ê peh-sìⁿ ê iûⁿ-kûn; in-ūi in beh chhin-chhiūⁿ bián-liû ê pó-chio̍h, kú-khí koâiⁿ-koâiⁿ tī I ê tōe-chiūⁿ.

17祂ê仁慈大到怎樣！祂ê súi好看到怎樣！五穀beh hō͘少年人勇健，新酒hō͘在室女也án-ni。I ê jîn-chû tōa kàu cháiⁿ-iūⁿ! I ê súi hó-khòaⁿ kàu cháiⁿ-iūⁿ! ngó͘-kok beh hō͘ siàu-liân lâng ióng-kiāⁿ, sin-chiú hō͘ chāi-sek-lú iā án-ni.

1當春天ê雨ê時，lín tio̍h對耶和華求雨，就是發出sih-nà ê耶和華；伊beh kā in落chōe-chōe chūn ê雨，hō͘ ta̍k人有田園ê菜蔬。Tng chhun-thiⁿ ê hō͘ ê sî lín tio̍h tùi Iâ-hô-hoa kiû hō͘, chiū-sī hoat-chhut sih-nà ê Iâ-hô-hoa; I beh kā in lo̍h chōe-chōe chūn ê hō͘, hō͘ ta̍k-lâng ū chhân-hn̂g ê chhài-soe.

2因為家內ê偶像講白賊，占卜ê看虛假，講無影跡ê夢，空空安慰人；所以in迷路親像羊；koh因為無牧者，致到受困苦。In-ūi ke-lāi ê ngó͘-siōng kóng pe̍h-chha̍t, chiam-pok-ê khòaⁿ hu-ké, kóng bô-iáⁿ-chiah ê bāng, khang-khang an-ùi lâng; só͘-í in bê-lō͘ chhin-chhiūⁿ iûⁿ; koh in-ūi bô bo̍k-chiá, tì-kàu siū khùn-khó͘.

3我ê受氣對hiah-ê牧者發作，我也beh辨理hiah-ê工ê山羊；因為萬軍ê耶和華看顧祂ê羊群，就是猶大家，hō͘ in親像祂ê好馬tī戰陣。Góa ê siū-khì tùi hiah ê bo̍k-chiá hoat-choh, Góa iā beh pān-lí hiah ê kang ê soaⁿ-iûⁿ; in-ūi bān-kun ê Iâ-hô-hoa khòaⁿ-kò͘ I ê iûⁿ-kûn, chiū-sī Iû-tāi ke, hō͘ in chhin-chhiūⁿ I ê hó-bé tī chiàn-tīn.

4厝角石tùi祂出，堅固ê釘也tùi祂出，交戰ê弓也tùi祂出，chiah-ê掌權ê也tùi祂出。Chhù-kak-chio̍h tùi I chhut, kian-kò͘ ê teng iā tùi I chhut, kau-chiàn ê keng iā tùi I chhut, chiah ê chiáng-koân-ê iā tùi I chhut.

5In beh親像勇士，tī戰陣踏對敵tī街路ê土糜中；in beh交戰，因為耶和華kap in tī-teh；見若騎馬ê無m̄見笑。In beh chhin-chhiūⁿ ióng-sū, tī chiàn-tīn ta̍h tùi-te̍k tī ke-lō͘ ê thô͘-bê-tiong; in beh kau-chiàn, in-ūi Iâ-hô-hoa kap in tī-teh; kìⁿ-nā khiâ-bé-ê bô m̄ kiàn-siàu.

6我beh堅固猶大家，拯救約瑟ê家；beh chhōa in tò來，因為我憐憫in；in beh親像我bē-bat棄sak in ê款；因為我是耶和華in ê上帝，我beh疼in。Góa beh kian-kò͘ Iû-tāi ke, chín-kiù Iok-sek ê ke; beh chhōa in tò--lâi, in-ūi Góa lîn-bín in; in beh chhin-chhiūⁿ Góa bē-bat khì-sak in ê khoán; in-ūi Góa sī Iâ-hô-hoa in ê Siōng-tè, Góa beh thiàⁿ in.

7Í-hoat-liân beh親像勇士；in ê心歡喜，親像lim酒；in ê kiáⁿ兒beh看見來歡喜；in ê心beh因為耶和華快樂。Í-hoat-liân beh chhin-chhiūⁿ ióng-sū; in ê sim hoaⁿ-hí, chhin-chhiūⁿ lim-chiú; in ê kiáⁿ-jî beh khòaⁿ-kìⁿ lâi hoaⁿ-hí; in ê sim beh in-ūi Iâ-hô-hoa khoài-lo̍k.

8我beh出口號，來聚集in；因為我已經救贖in，in beh加添親像in前ê加添。Góa beh chhut kháu-hō, lâi chū-chi̍p in; in-ūi Góa í-keng kiù-sio̍k in, in beh ke-thiⁿ chhin-chhiūⁿ in chêng ê ke-thiⁿ.

9我雖然四散in tī列國中，in beh tī遠ê所在記念我；in kap in ê kiáⁿ兒lóng beh活teh，koh tò來。Góa sui-jiân sì-sòaⁿ in tī lia̍t-kok-tiong, in beh tī hn̄g ê só͘-chāi kì-liām Góa; in kap in ê kiáⁿ-jî lóng beh oa̍h--teh, koh tò--lâi.

10我beh koh hō͘ in tùi埃及tò來，聚集in出亞述；chhōa in到Ki-lia̍t地kap黎巴嫩；也無夠額所在thang hō͘ in khiā起。Góa beh koh hō͘ in tùi Ai-ki̍p tò--lâi, chū-chi̍p in chhut A-su̍t; chhōa in kàu Ki-lia̍t tōe kap Lī-pa-lùn; iā bô kàu-gia̍h só͘-chāi thang hō͘ in khiā-khí.

11伊beh經過苦難ê海，攻擊海中ê波浪；尼羅河深ê所在beh lóng乾去；亞述ê驕傲beh降低，埃及ê權柄beh無去。I beh keng-kè khó͘-lān ê hái, kong-kek hái-tiong ê pho-lōng; Nî-lô hô chhim ê só͘-chāi beh lóng ta--khì; A-su̍t ê kiau-ngō͘ beh kàng-kē, Ai-ki̍p ê koân-pèng beh bô--khì.

12我beh hō͘ in tī耶和華勇壯；koh託伊ê名行來行去；這是耶和華講ê。Góa beh hō͘ in tī Iâ-hô-hoa ióng-chòng; koh thok I ê miâ kiâⁿ-lâi kiâⁿ-khì; che sī Iâ-hô-hoa kóng--ê.